Daxmeh geq lo, mbouj miz gijmaz ngah. Couhcinj seizneix dwg seizdaih gohgi, soujgih、densigih、dennauj daengj yienghyiengh cungj miz, hoeng gij yiengh haenx doiq daxmeh daeuj gangj yunghcawq mbouj daih. Aenvih seiz daxmeh lij iq, ndaw ranz gungzhoj, mbouj miz ngaenz bae hwnj hagdangz, dingqnyi daxmeh gangj, seizhaenx, de cij ndaej doeg song haggeiz saw, couh mbouj ndaej doeg lo. Ndigah, seizneix daxmeh gij cih de roxnaj, comzgyoeb hwnjdaeuj cungj cang mbouj rim aen loz ndeu. Gangjnaeuz yawj densi cezmuz ma, daxmeh cij rox yawj gij vunz ndaw densi diuq bae diuq dauq, couh lumj vahsug gangjnaeuz “Ma yawj raemx roengz” yienghhaenx, gangjdaengz gyoengqvunz ndaw densi gangj vah gijmaz, daxmeh couh gawq vah ndeu hix dingq mbouj rox lo. Yienghneix, ndaw ranz ngamq cawx ndaej densi ma, daxmeh angq ndaej mboengq ndeu, couh caiq hix mbouj ngah yawj densi lo.

Itdingh yaek gangj daxmeh miz gijmaz ngah, goulau cijmiz cungj ngah ndeu, cungj ngah neix itcig buenx daxmeh baenz ciuh vunz.

Daihgya cungj rox, youq lajmbanj Bouxcuengh raeuz, riuz ndaej caez gvangq caez nanz couhdwg ciengq beij euq fwen. Youq gohgi caengz fatdad seiz, saeklai mbanjmbanj cungj miz canghbeij canghfwen, baez daengz gvaqciet roxnaeuz guh laeuj cingj hek, cungj aeu cingj gyoengq cangh- beij canghfwen daeuj mbanj daeuj ranz ciengq beij eu fwen, baez daengz baij daiz eu fwen, daengx mbanj bouxlaux、hauxseng、lwgnyez cungj comz daengz ranz haenx bae dingq, ndaw ranz vunz lai vunz daih, caenxnyubnyub, nauhyied dangqmaz. Daxmeh ngah dingq beij dingq fwen goulau hix dwg daj seizhaenx hagbaenz ba.

Hoeng, seizneix mbouj doengz seizhaenx lo. Aenvih seizdaih fazcanj, sevei cinbu, haujlai conzdungj ndei caeuq fuengsik guh’angq gaxgonq hix menhmenh deng yendai vwnzmingz vutgveng bae lo. Couh lumj dieg Bouxcuengh raeuz gyaez ciengq beij eu fwen aen conzdungj ndei caeuq fuengsik guh’angq neix, seizneix youq lajmbanj Bouxcuengh raeuz hix ciemhciemh deng gyoengq hauxseng lumz bae lo. Gyoengq bouxlaux siengj dingq saek coenz beij roxnaeuz saek coenz fwen, lau beij siengj gwn saek donq noh lij hoj ha. Vihneix, daxmeh ciengzseiz youq baihnaj gou gangj, danghnaeuz miz aen maz lumj aen densigih iq yienghhaenx, dingq ndaej vunz ciengq youh yawjraen dozsiengq, aeu daeuj cuengq fwen geijlai ndei a!

Roxyiuj daxmeh miz cungj simnyienh neix, gou itcig geiq youq ndawsim. Daxmeh soqlaiz dwg boux- vunz roxsoq, doiq gyoengqlwg dou itbuen mbouj miz gijmaz iugouz sang, ndwenngoenz lij gvaq ndaej bae, couh gvaqbae lo. Seizneix daxmeh cingq- ging youq baihnaj gou gangj daengz yienghneix, cingqmingz daxmeh gag youq ranz itdingh mbwq lai, mboujnex, daxmeh cij mbouj gangj okdaeuj.

Ngamjhab youq bineix, gou okcai bae ndaw singz, miz hoengq seiz, gou couh bae ndaw sanghcangz denswj youz, yawjyawj miz mbouj miz cungj canjbinj denswj lumj daxmeh siengj aeu. Youz ndaej buenq ngoenz, doeklaeng gou dauqdaej youq mbangj gvihdaiz gai DVD gizhaenx ra daengz lo. Cungj canjbinj denswj neix, beij aen yingjdezgih iq lai, couh miz bonj saw ndeu yienghneix hung, mingzcoh heuh guh “luzfang yingjgih”, mbouj bengz, song bak lai maenz ngaenz. Dingq bouxgai gaisau gij goengnaengz cozyung le, gou mbouj lawq saekdi, hawj ngaenz couh cawx roengzdaeuj. Gou rox, gou cawx ndaej aen doxgaiq neix, couh lumj cawx ndaej aen simnyienh daxmeh lo. Danghnaeuz okcai le ma ranz dangguh aen saenzcingz soengq hawj daxmeh, mbouj rox daxmeh angq baenzlawz bae.

Okcai ma daengz ndaw yienh dou, gou youh leihyungh ngoenz- singhgiz bae gwnz haw youz, bae daengz diemq gai miz gvanghdez, cawx ndaej gij gvanghdez ciengq beij eu fwen. Yienghneix, cungj suenq aen an caeuq duzmax boiq caez lo.

Ndwencieng cuengqgyaj gou caeuq yahlwg caez bae ranzmbanj gou, dou daiq aen luzfang yingjgih caeuq gvanghdez ganj ma ranz. Daengz ranz le, gou doiq daxmeh gangj:“Daxmeh, bineix mbouj cawx buh moq caeuq haiz moq hawj mwngz lo, hoeng, gou soengq aen saenzcingz ndeu hawj mwngz, baujcwng beij soengq buh moq caeuq haiz moq hawj mwngz engq ndei, mwngz cai dwg gijmaz?”

Daxmeh dingqnyi gou gangj le, doiq gou naeuz:“Gwnzbiengz miz baenzneix lai dijbauj, gou cai mbouj okdaeuj bw!”

Gou naeuz:“Mwngz itdingh cai ndaej okdaeuj, mwngz siengjsiengj, mwngz ceiq siengj aeu gijmaz?”

Daxmeh loq ngeix yaep ndeu, couh gig gikdoengh dwk dap: “Nanzdauh……Nanzdauh……Mwngz cawx ndaej……”

Gou riu dwk naeuz: “Dwg ha, gou caen bang mwngz cawx ndaej aen gih- gi mwngz itcig siengj aeu, caemhcaiq lij cawx ndaej gij gvanghdez ciengq beij eu fwen dem.”

Gangj sat, gou daj ndaw daeh dawz ok aen luzfang yingjgih caeuq gvanghdez ndenq hawj daxmeh. Daxmeh iet song cik fwngz daeuj coux, ndaw bak niemh gawq vah he:“Lwg ha, mwngz caen miz sim, siengj mbouj daengz, gou gangj coenz vah mbouj miz sim ndeu, mwngz dauqfanj geiq youq ndawsim, lij bae ra bae cawx dauq hawj gou!”

Gou naeuz:“Meh a meh, mwngz ciengx gou baenzneix laux, mwngz miz aen simnyienh neix, bang mwngz saedyienh de, neix dwg wnggai, muengh daj seizneix baenaj, mwngz youq ranz mbouj lumj gaxgonq yienghhaenx mbwq couh ndei lo!”

Haemhhaenx, gwn haeux sat le, gou son daxmeh baenzlawz cuengq luzfang yingjgih, dang ndaw luzfang yingjgih yienh’ok song boux vunz doiq fwen, cienz daeuj gij sing eufwen rwenzred seiz, gou yawjraen gwnz naj daxmeh riunyumnyum.