Denzyangz Yen Douzdangz Cin Mbanjluzguz daj ndaej dingh guh ndaw yienh aenmbanj guhyiengh siujgangh gvaqdaeuj, gaenxgoemx cujciz vunz- mbanj guh ndei hong dajndaem dajciengx, hwnjguh aenmbanj moq, cauxmoq hongsaeh ndaw mbanj minzcuj guenjleix gihci. Doenggvaq roengzrengz guh geij bi, ndaw mbanj ranzlaeuz moq guh ndaej baenz baiz baenz coij moqsagsag, yiengh mbanj gyaeundei, ndaw mbanj cinghseuq, roensuijniz gvangq youh bingz doeng daengz gak aen ranz. 2003 nienz boux Cunghgung Cunghyangh cungjsuhgi seizde Huz Ginjdauh daeuj Guengjsae raeuz cazyawj seiz, lij bae daengz aen mbanj neix cazyawj gvaq, goengdaeuz Swcigih raeuz caemh gonqlaeng bae aen mbanj neix diuyenz gvaq bw.

Mbanjluzguz dieg youq ndaw lueg Dahyougyangh, diuz goengloh namzbaek ndeu con gvaq henz mbanj, liz yienhsingz 10 goengleix gyae, swyenz diuzgen ndei raixcaix. Daengx mbanj miz 98 ranz 400 lai vunz, dwg buek daih’it “mbanj guhyiengh siujgangh” Denzyangz Yen laebdingh ndawde aen ndeu. Daj bi 2003 ndwen 1 hainduj hwnjguh “mbanj siuj- gangh” daengz bi 2007 ndwen 10 loq guhbaenz, daengx mbanj cunhminz gaenq cienzbouh buen haeuj ranzlaeuz moq youq. Geij bi haenx, vunzlai aen mbanj neix youq daengx yienh aen daih’it yinx makyungz iq binjcungj moq ma ndaem, lienzdaemh ndaej fungsou, gya hwnj gaenx dajndaem dajciengx, souhaeuj bi lai gvaq bi, seizneix moix bi moix vunz bingzyaenz cinghsouhaeuj mauhgvaq 6000 maenz ngaenz.

Vunzlai aen mbanj neix aeu dajndaem doenghgo dijngaenz binj- cungj daegsaek guhcawj, lij miz bouxcoz okrog dajgoeng dem, doxgap banh miz guh doxgaiq dajcaep、ranzhekninz doenghgij hong neix. Cunhminz Vangz Vwnzyingh ndaw ranz gungh 5 vunz, gaxgonq song daeglwg okrong dajgoeng. Doeklaeng de youq cunhcihsuh Vangz Gwz haeujcoengh caeuq bangbouj lajde, hag rox gisuz ciengx douq、duzgoep、bya, bi haenx sien ciengx douq canh ndaej fanh lai maenz ngaenz le, couh youq gyanghongh caeuq laengranz caepguh rungzdouq caeuq daemzbya daemzgoep, gyalai dajciengx, moix bi souhaeuj mauhgvaq 5 fanh maenz. Riengzlaeng de cawx ma giceh、dennauj, daeglwg de caemh maranz bang de hai ci rag huq. Vangz Vwnzyingh baenz yienghndei guh- daeuz baenz fouq le, vunzmbanj doxcaeh daeuj ra de hag ciengx douq、goep、bya gisuz, de cix angq dwk soncienz gisuz caeuq gingniemh, mwh vunz daeuj cam lai le, de hixnaengz banh hwnj beizyinbanh, mienxfeiq son dajciengx gisuz hawj gyoengq beixnuengx, hawj vunzmbanj caemh baengh dajndaem dajciengx byaij diuz roen fouq.

Youq ndaw mbanj, vunzlai ndaej yawjraen baenz baiz baenz coij ranzlaeuz song sam caengz haenx daengj youq ndaw raemh faexloeg, caezcingj dwk baiz youq song henz diuz roen suijniz bingzbwd gvangqlangh ndeu, ranzranz doeng raemxgagdaeuj, doeng dienh doeng bilu densi, mbangj naj ranz lij dingz miz ci’gyauceh dem. Goenglaux naihbuz song sam boux comz dwk naengh youq bakdou ranz gangjgoj, saekseiz raen miz geij boux lwgnyez buet haeuj buet ok doxgyaep doxgyaz, yienghsiengq saedceij andingh vuenyungz.