Seiqhenz Mbanjsae miz geij bak moux ndoi bingz. Ndaw rungh miz 4 aen daemz, seizhah miz raemx seizdoeng hawq. Mbanjsae miz 20 lai ranz, gyoengqde dep bya gwn bya, ranz ndeu bau geijcib moux diegndoi ndaem gomak、gooij、gofaiz、gova…… Ndaej ngaenz haeuj haemq lai.

Miz naih laux he, heuhguh Buzgvai, 60 lai bi lo, ndang lij cangq bw. De miz dah lwg ndeu haq daeuj Mbanjsae. Bi’gvaq yienghneix, de daeuj caeuq dahlwg de youq. Lwggwiz de mbouj miz faenh bae bau diegndoi, leuxle couh bae suijnizcangj guhhong, gyanghaet couh bae daengz gyang- haemh cij dauq, youq ndaw cangj gwn sizdangz, boux ndeu ndwen ndaej 2 cien lai maenz ngaenz. Dahlwg Buzgvai ciengz naeuz:“Miz gyaq ciiq ndeu couh ndei lo, bae hwnjban couh youh mbouj deng ndit dak hix mbouj deng fwn rwed.” Buzgvai naeuz:“Wnggai miz ci, caj raeuz miz ngaenz lai di menh cawx.”

Buzgvai seiz ngamq daeuj Mbanjsae, miz seizgan de couh bae mbanj seiqhenz lauh. De menhmenh rox, Mbanjsae gaenh geij bi daeuj caemh mbouj miz vunz ciengx cwz, aenvih dieg nywj siuj, ndaw ndoengfaex mbouj hawj langh cwz. Yienghneix, Buzgvai couh baema ranz de yien duz cwz ndeu daeuj daengz Mbanjsae ciengx. Dahlwg de mbouj hawj de ciengx, lau de ciengx cwz baeg lai, heuh de dawz ranz couh baenz lo. Hoeng de mbouj dingq, de naeuz ndaw ndoeng miz nywj lai, ndaej bae gvej dauq ciengx cwz a.

Miz ngoenz he, Buzgvai bae haw cawx faengx, de youq ndaw diemq caeuq bouxgaifaengx gangj guh gijmaz ndaej ngaenz lai di, gangj buenq ngoenz bae, cungj naeuz ciengx cwz ndaej fatcaiz.

Buzgvai ciengx cwz gig sijsaeq. De haetcaeux mbouj lau raiz, banringz mbouj lau ndit, ca mbouj lai moix ngoenz bae gvej 2 daengz 3 daeh nywj dauqdaeuj. Duz cwz gwn mbouj liux, de couh dawz nywj daengz gwnz laeuz bae dak, dak daengz nywj sauj le couh yo ce daengz seizdoeng laebdaeb dwk cwz. Bungz vunzwnq raemj oij, de bae cam aeu mbawoij dauqdaeuj ranz.

Gvaq ndaej bi lai seizgan, dahlwg raen duz cwz de maj ndaej youh hung youh biz, ndawsim gig angq, engqgya hauqswnh Buzgvai lo.

Miz ngoenz he, Buzgvai doiq dahlwg caeuq lwggwiz de gangj:“Sou bae cawx gyaq ciiq ba, gou ok 7 fanh maenz ngaenz, danghnaeuz ngaenz lij caengz gaeuq, ndaej gai duz cwz gou ciengx bae.” Dahlwg de baez dingq doeksaet caez, cam Buzgvai:“Daxmeh mwngz baenzlawz miz baenzlai ngaenz a?” “Lwg ha, gou daeuj daengz gizneix caeuq sou youq hix ndaej bi lai lo, gou bae geij aen ndoeng gofaizgaeu aeu rong dauq dak sauj dauz baenz gwed le couh dawz bae haw gai hawj lauxbanj ndeu, de yinh bae ndaw singz gai. De hawj gou gaen ndeu 5 maenz ngaenz. Gou youh goq song yahlaux caeuq gou itheij guh, dou ngoenz he boux vunz ndeu aeu ndaej 50 gaen baedauq. Liggaeuq 5 daengz 11 nyied ceiq ndei aeu rong. Cingh gai rong gou couh ndaej 5 fanh lai maenz ngaenz lo. Henz 4 aen daemz maj miz haujlai goyw, gaen sauj he couh ndaej 6 maenz ngaenz. Gou gag bae gvej, bouxvunz yawj lo cungj nyinhnaeuz gou dwg aeu ma ranz daeuj hawj duz cwz gwn, hix mbouj caeuq gou ceng bae gvej. Gou gai goyw youh ndaej fanh lai maenz ngaenz la.” “Daxmeh, mwngz sinhoj lai lo……” “Lwg ha, mbouj dwg yienghneix gangj, gou ndang lij cangq, youh daengx mbouj roengzdaeuj, ndaej guh di hong gou gamjdaengz gig angq, gij hong gou seizneix guh beij gaxgonq ndaem naz soeng lai lo. Sou hix mbouj miz geijlai ngaenz, mbouj yungh ngoenznaengz youq ranz caj sou daeuj ciengx gou, gou lij ra ndaej di ngaenz daeuj bang sou, gou maengx dahraix. Hai, cijaeu gaenx guh rox guh, mbouj yungh lau gvaq mbouj ndaej saedceij ndei. Neix couhdwg dep bya gwn bya, dep raemx gwn raemx bw.”