Gyanghaet caet diemj cung, gou deng raq dem raq sing bauqrengh nauh singj, lwgda gou caengz cengq liux, lij raninz ne, gou gamjdaengz gig fanz.

Cieng cibngux dwg aen ciet conzdungj guek raeuz, youq 2000 lai bi gonq couh miz lo, aen ciet neix daj ndaw gunghdingz cienz haeuj ndaw beksingq, youz Cunghyenz cienz daengz cienz guek. Ndaejgeiq gou lij iq seiz, Cieng cibngux wnggai dwg aen ciet vunz daengx ranz naengh roengzdaeuj, itheij guh ceizraemxrouh daeuj cawj gwn, doeklaeng caiq cuengq bauqva. Hoeng, vunz yied maj yied hung, doiq ngoenzciet couh gamjdaengz yousieng. Lauheiq dwg aenvih bi’ndwen caeuq seiqhenz ba, seizneix caiq hix ra mbouj ndaej gij gamjgyoz gaxgonq gvaq ciet lo. Gou ndwn youq gwnz yangzdaiz, doenggvaq aencueng yawj roengz laj bae, aen gih iq neix miz sing lwgnyez guhcaemz caeuq sing bauq, hawj gou siengj daengz seiz gou lij iq.

Gou lij iq seiz, cieng cibngux diegcoj cawz bae guh ceizraemxrouh daeuj cawj gwn, gyoengq lwgnyez lajmbanj lij youq gyangngoenz bae reihnaz gag ranz gip fiengz. Gip liux couh comz baenz byoz baenz byoz, caj daengz gyanghaemh gwn ceizraemx- rouh liux, cawjranz couh rox daiq lwgnyez daengz reihnaz, itheij byaeu fiengz gyangngoenz gyoengq lwgnyez gip, vanzlij humx dongfeiz, diemj bogfeiz, ciengq go lwgnyez. Daengx bo caeuq ndaw reihnaz cungj dwg gij gingjsaek byaeu fiengz hwnj rongh- sagsag, gyoengq lwgnyez cuengqbauq, diemj bauqva, ciengq go lwgnyez……

Gvaq ndaej haujlai bi, lizgyae diegcoj youq baihrog guhhong, cij rox ceizraemxrouh baihrog lij miz gaiq nduen, caeuq ceizraemxrouh diegcoj gou mboujdan dwg yienghceij rox- naeuz feihdauh caemh miz haujlai mbouj doengz. Ceizraemxrouh diegcoj miz gok, yawj bae baihgwnz soem baihlaj nduen, yienghceij miz di lumj aen faengx youq ngux nyied co’ngux seiz guh, hoeng beij aenfaengx iqet caeuq ndeigyaez. Ceizraemxrouh diegcoj guh hwnjdaeuj gig fukcab caemhcaiq ndawsim miz lai cungj. Vunz diegcoj daengz ndwenlab cibngux doeklaeng couh hainduj ranzranz daemmuh haeuxcid mienz, aeu daeuj guh ceizraemxrouh. Ndawsim ceizraemxrouh dwg aeu youzlauz duzmou、duhnamh、mak- hwzdauz、lwgraz、dangznae、naeng makdoengj roxnaeuz dangznding daengj lai cungj doxgaiq gyaux guh baenz. Hoeng, mboujguenj dwg gijmaz doxgaiq bae guh ndawsim ceiz- raemxrouh, cungj dwg nanz guh dahraix, di ndeu mbouj haeujsim, gij ceizraemxrouh guh okdaeuj gig yakyawj caemhcaiq gij dangz lij rox conh okdaeuj dem. Itcig daengz seizneix gou hix mbouj rox vihmaz vunz diegcoj yaek guh gij ceiz- raemxrouh miz gok, hix mbouj rox gij yiengh ceizraemxrouh neix dauqdaej cienz liux geijlai bi, maihlaez bouxlaux diegcoj cungj mbouj raen fanz dwk son dou guh ceizraemxrouh miz gok.

Ceizraemxrouh itbuen dwg youq cieng cibngux gwn, hoeng, youq diegcoj gou, ceizraemxrouh dwg daj gyanghaet Cieng coit couh hainduj gwn lo. Ngoenzde ne, ranzranz guh ceizraemxrouh daeuj cawj gwn. Cieng coit ngoenz neix, vunz daengx ranz cungj doxcomz hwnjdaeuj, baugvat lwgmbwk haq okbae, gyanghaet hix daiq gvan caeuq lwgnyez dauqma ranzmeh baiqcieng. Bi moq hainduj ngoenz daih’it, gijgwn lawh、soemj、manh、diemz、haemz cungj deng cuengq youq baihhenz, ceiq ndei couhdwg gwn ceizraemxrouh. Aenvih ndawsim ceizraemxrouh diemz, hoh caezgya youq bi moq ndwenngoenz lumj ceizraemxrouh nei gvaq ndaej van. Danghyenz, danghnaeuz miz ranz lawz dahnuengx iu di, youq guh ceizraemxrouh seiz, laeglemx guh geij aen ceizraemxrouh youh manh youh hamz, daegdaengq daek hawj gyoengq beixgwiz gwn, hawj gyoengq beixgwiz caeuq caezgya gwn ceizraemxrouh seiz saetnaj, baenzlawz hix miz geij boux vunz riu okdaeuj. Youq ndaw sing riu, daengx ranz doq angq caez.

Rumz cueng baihrog ci gig hung, ndit gig haenq, sing rumz dwkduenh ngeixdauq gou lo. Gig muengh gou ndaej caiq dauqma seiz iq, caeuq bouxcaen itheij gvaq cieng cibngux.