Sanhgyangh Dungcuz Swciyen Duzdung Yangh Mbanjgauhding dwg gij mbanj Dungcuz Guengjsae raeuz baujhoh louzce ndaej haemq ndei ndawde aen ndeu, ndaw mbanj mbouj miz saek aen ranzlaeuz suijniz, cix dwg ranzlaeuz benjfaex ciuq gij fuengfap dajcaep conzdungj Dungcuz, hwnjguh youq gwnz lingq goengqbo, mbouj aeu saek diuz dingdiet, cienzbouh dwg baengh canghcaep gag suenq gag caep, aeu conghsiuq、dingfaexcuk doq gap guhbaenz, daengj baenz bak bi mbouj doemq, dwg aen mbanj Dungcuz louzce yiengh sengcingz ciuhnduj haemq ndei ndeu.

Gauhding, gij eiqsei vah Dung- cuz dwg ngiengx gyaeuj enj aek. Mbanjgauhding gungh miz 6 aen laeuzgyong, moix gyog fuengzcug aen ndeu, youz vunz ndaw fuengzcug gag okngaenz hwnjguh. Mbanjgauhding miz seiq aen fuengzcug guh le laeuzgyong, lingh miz aen laeuzgyong hung ndeu dwg aen daengx mbanj, lij miz aen iq ndeu dem dwg gaxgonq aeu gij mingzdaeuz swnghcanjdui ma hwnjguh; ndawde miz aen laeuzgyong ndeu gig daegbied, heuhguh laeuz- gyong saeu dog, daengx aen laeuz- gyong cij miz diuz saeu hung ndeu daemxdingj, daj neix ndaej rox gij coengmingz caeuq dinfwngz ndei vunz Dungcuz lo. Byaij bae yawj gij laeuzgyong neix, cix boiqfug gij dinfwngz dajcaep ndeindiq vunz Dungcuz, ciuq gyoengqde gangj, gyoengqde guh laeuzgyong roxnaeuz guh giuzndojfwn roxnaeuz guh ranzcanx, cungj mbouj yungh veh dozceij gvaq, cungj dwg baengh boux saefouh ciuq ndawsim siengj caeuq gingniemh bae guh, guhbaenz le mboujdan dinfwngz ndei yienghsiengq lengj, caiqlij maenhdwt yungh ndaej nanz, fwn dub ndit dak rumz bongj, bi gvaq bi, lij louzce gij gyaeundei caeuq simsaenq hawj raeuz.

Youq ndaw mbanj byaij ha byaij, dingjlingz ndaej raen vunzmbanj cingq guh ranzcanx moq, gyoengq vunzmbanj cingq baizdoih dwk ndenq vax hwnj dingjranz gang vax, daihgya gangjgangj riuriu, angqyangz doxhuz. Yienznaeuz seizneix gak ranz gag guh, hoeng ndaw mbanj vunzlai lij dwg doxbang doxcoengh, miz ranz lawz guh ranzmoq, ranz lawz ndaw ranz banh saeh, daihgya cungj gagnyienh daeuj bang ok di rengz, cungj simndei neix hawj hekyouz boiqfug.

Youq ndaw Mbanjgauhding, byaij gvaq giuzndojfwn, bin hwnj laeuzgyong saenzgeiz daegbied, ndoet gwn youzcaz homfwt, dingq gij golaux rwenzred gokhap haenx le, laihnaeuz gijneix couh yawj doh fungcingz caeuq saenzgeiz Mbanjgauhding lo, hoeng vunzlaux ndaw mbanj naeuz, danghnaeuz dwg seiz cousou geizciet daeuj, daengz seizde gyoengq lwg- mbauq dahsau ndaw mbanj okrog dajgoeng doegsaw haenx dauqma, diuq gij foux angqyangz、boq gij aenvenz gokrwd sepset haenx hwnjdaeuj, caiq youq ndaw sing go laeuj hom ngaizbakranz daejniemh gij saedceij gyaeundei vunz Dungcuz, cij dwg ceiq gyaeundei ceiq angqyangz ne, dingq le caen hawj vunz siengjmuengh ha!