□Veiz Yennaz Luz Yinzhwz

Vanzgyangh Mauznanzcuz Swciyen Swh’wnh Cin Yinzhoz Siujyoz youq bi 1984 hainduj guh Cuengh Gun song saw vah sonhag. Lai bi daeuj, hagdangz genhciz aeu “cibroek cih” fuengcim hong Cuengh Gun song saw vah sonhag neix daeuj sonyinx sonhag, roengzrengz damqra Cuengh Gun song saw vah sonhag gingniemh, guh gak cungj Sawcuengh sonhag hozdung, sawj hagdangz hong Cuengh Gun song saw vah sonhag mboujduenh ndaej daezsang, sonhag cingzcik youq daengx yienh doengzloih hagdangz ndawde ndaej baizmingz daih’it, ndaej Swcigih Gyauyuzdingh liedguh aendieg guhyiengh Cuengh Gun song saw vah sonhag swcihgih.

Yinzhoz Siujyoz dawz Cuengh Gun song saw vah sonhag cizlieng dangguh aen neiyungz youqgaenj dwkcaux binjbaiz hagdangz、daegsaek hagdangz, dawz de lied haeuj ndaw hong sonhag hagdangz daeuj ca. Hagdangz laebbaenz Sawcuengh sonhag duzcazcuj, yaucangj guh cujcangj, dinghgeiz genjcaz hagseng doeg Sawcuengh 、guh cozyez Sawcuengh caeuq lauxsae sij gyauan Sawcuengh cingzgvang. Vihliux daezsang sonhag cizlieng, hagdangz mbouj- dan haenqca lauxsae gihbwnjgungh yinlen, engqgya yawjnaek ca ndei sonhag guenjleix, youq sonhag ndawde, iugouz moix boux lauxsae aeu gvaq “haj gvan”: It dwg dawzyiemz gvan beigo, gyauan aeu miz cauxmoq; ngeih dwg dawzyiemz gvan hwnjdangz, sonhag yaugoj aeu miz cingzyauq; sam dwg dawzyiemz gvan gaij cozyez, ndaej bang hagseng lai sug Sawcuengh gihcuj cihsiz; seiq dwg dawzyiemz gvan gvaqlaeng son’gyauq, hawj hagseng geiqmaenh gij cihsiz son gvaq haenx; haj dwg dawzyiemz gvan caekbingz, demgiengz le lauxsae sonhag cwzyinganj. Baenzneix guh le, sawj hagdangz song saw vah sonhag cizlieng ndaej yamqonj daezsang.

Yinzhoz Siujyoz vihliux hawj minzcuz gyauyuz hozdung guh ndaej engq ndei, cungfaen leihyungh gak fuengmienh ligliengh guh minzcuz vwnzva swnjcienz hozdung, dawz vwnzva maenhndei Bouxcuengh dangguh aen cawjdaez hagdangz vwnzva gensez ndeu, youq gwnz ciengzgvaengh hagdangz guh ciengz vwnzva minzcuz, gwnz ciengz veh gak cungj doz vwnzva yenzsu Bouxcuengh, boiq gaisau neiyungz, miz doz miz saw, doengsug heih rox, baijok le fungcingz fungsug Bouxcuengh; hagdangz lij dawz gofoux minzcuz yinxhaeuj ndaw hagdangz, lumj gocouxhek、gosoengqhek caeuq gocamndei Vahcuengh. Moix baez miz bouxhek daeuj hagdangz, gyoengq hagseng cungj aeu Vahcuengh biucinj ciengq eu fwencouxhek angqcoux bouxhek, diuq foux minzcuz. Hagdangz lij laeb gij goq dijyuz minzcuz conzdungj haenx, lumj maxfaex doxdax、haizgiegraez doxdax、diuq fouxsaux、dwk lwggyangq、bau aen- domq daengj, moix aen singgeiz guh song baez dagogenh minzcuz dijyuz hozdung. Youq ciet “sam nyied sam”、“roek it” ciet lwgnyez、ciet gozging caeuq ciet yenzdan, hagdangz cungj guh minzcuz dijyuz yindung hanghmoeg doxdax. Hagdangz lij cujciz lauxsae yungh seizhoengq bae lajmbanj vatgud、cingjleix、soucomz minzcuz ndaw- biengz vwnzva, sawj gij neiyungz minzcuz vwnzva haeuj hagdangz haenx engqgya fungfouq.

Faenh rengz faenh souhaeuj. Ginggvaq lai bi roengzrengz haenqguh, Yinzhoz Siujyoz hong Cuengh Gun song saw vah sonhag aeundaej cingzcik yienhda. Bi 2011 ndwen 10, Moz Cunhmung doengzhag camgya daengx gih siujhagseng gangj gojgaeq biucinj Vahcuengh doxdax aeundaej daih- ngeih mingz, Luz Yinzhwz lauxsae aeundaej maenhndei yinxson ciengj. Bi 2014 ndwen 10, Mungz Cez doengzhag camgya gaiq daihsam daengx gih siujhagseng gangj gojgaeq biucinj Vahcuengh doxdax aeundaej samdaengj ciengj, Cinz Yivangj lauxsae aeundaej maenhndei yinxson ciengj. Bi 2011, Moz Cunhmung、Moz Liyaz daengj song boux doengzhag aeundaej daengx gih siujhagseng cozvwnz Sawcuengh doxdax ngeihdaengj ciengj. Geij bi neix daeuj, hagdangz miz 30 lai bien faenzcieng hagseng ndaej daeng youq gwnz 《Gvangjsih Minzcuz Bau》caeuq 《Sam Nyied Sam》cazci. Hagdangz daj bi 2010 daengz bi 2014, youq ndaw cin guh sonhag cizlieng cunghhoz bingzbeij ndawde, baiz youq daih’it mingz.