Lienhndang dingj nit doiq ndang vunz miz ik, doiq sim sailwed、diemheiq、siuvaq、yindung、raemx ndaw ndang iemqok caemh miz bangcoh, ndaej gemjsiuj fatseng gvanhsinhbingh、sailwed uk loeklak、dwgliengz、baenzae、hoh in、fat biz daengj bingh. Doengzseiz, dingj nit ndaej hawj vunz souhgyaeu, doiq bouxcoz daeuj gangj, dingj nit lij ndaej lienh ceiqheiq bouxvunz.

Bouxvunz dingj nit yienznaeuz miz itdingh hanhdoh, vunz caeuq vunz aenndang mbouj doxdoengz, deng nitgyoet gig fanjying hix miz cabied, hoeng, doenggvaq lienh- ndang ndaej hawj ndang vunz lai dingj ndaej nit. Baenzlawz ok baihrog bae lienhndang? Caj mbwn nit le caiq lienhndang couh ceiz lo. Aenvih dohraeuj daj sang bienq daemq, bouxvunz lienhndang hix wnggai hawj ndang vunz cugciemh sikwngq nitgyoet. Danghnaeuz vunzraeuz genhciz daj ngoenz mbwnndat daengz ngoenz mbwngyoet moix haet ok rog bae youzbyaij, sup aeu hoengheiq singjsien baihrog, yienghneix bouxvunz couh menh- menh dingj ndaej nit lo. Danghnaeuz mbwn caiq gyoet di, wng caiq guh di lienhndang haenq ndeu, beijlumj buet、dwkgiuz、bin bya daengj, bouxvunz youq ndaw rumzgyoet hix mbouj gamjdaengz nit lo. Vunz ciuhgonq cungjgez ok aen fuengfap “seizcou liengz” ndeu, gizsaed couh wnggai dwg lienhndang daeuj dingj nit.