Vujmingz Yen Daibingz Cin Gingloz Siujyoz dwg aen cunh gaep siujyoz youq dieg Bouxcuengh comzyouq he. Hagdangz youq bi 1950 laebbaenz, 98% doxhwnj dwg hagseng Bouxcuengh. Aen hagdangz neix dangguh swcigih Cuengh Gun song saw vah sonhag saedniemh hagdangz ndawde aen he, lai bi daeuj, hagdangz cungfaen fatok gijndei Cuengh Gun song saw vah sonhag, laebhwnj “haengj、 angq、 huz” banhhag leixniemh, haenqrengz swnjcienz caeuq baujhoh feihvuzciz vwnzva yizcanj, hopheux minzcuz gyauyuz “roek aen it” gunghcwngz, gaenxmaenx haiguh minzcuz doxgiet cinbu haeuj hagdangz hozdung, cingzcik yienhda.

Laeb gyauyuz leixniemh moq, caux hozdung lohnaemj moq. Hagdangz ciuqei gyauyuz fuengcim caeuq minzcuz cwngcwz dangj, hopheux hagdangz “swnjcienz minzcuz vwnzva, gungganq vunzmoq Mbanjcuengh” banhhag moegbiu, cugbouh laebdingh minzcuz doxgiet cinbu cauxlaeb hozdung haeuj hagdangz guh hong lohnaemj moq, giendingh aeu minzcuz doxgiet cinbu cauxlaeb hozdung caeuq yozgoh sonhag doxcaez giethab, caeuq hagdangz vwnzva hozdung doxcaez giethab, caeuq gyaranz、 ndawbiengz gyauyuz doxcaez giethab, baujmaenh hagdangz haiguh minzcuz doxgiet cauxlaeb hozdung cangqheiq miz bouhloh hwngfat.

Swnjcienz minzcuz vwnzva, haiguh song saw vah gyauyuz, hagdangz haenqrengz guh minzcuz conzdungj vwnzva gyauyuz, doeng- gvaq hailaeb “minzcuz fungcingz caeuq vwnzmingz hagdangz”“conz- dungj ngoenzciet caeuq rengzhoengh hagdangz”“minzcuz dijyuz caeuq cangqheiq hagdangz” daengj yaubwnj gocwngz, cungfaen fatok gijndei song saw vah sonhag, hopheux minzcuz doxgiet gyauyuz “roek aen it” gungh- cwngz hwnjguh, hawj minzcuz vwnzva haeuj hagdangz hozdung caeuq hong dwzyuz、 Cuengh Gun song saw vah sonhag saedniemh ndeindei giethab.

Gohyenz yinxlingx hwnjguh, coicaenh hagdangz hwngfat. Hag- dangz guh yozcenzbanh Sawcuengh gyoepyaem、 Cuengh Gun song saw vah nyinhsaw、Cuengh Gun song saw doegyawj sonhag daengj dangzgoq yenzgiu, daezok le giendingh “aeu vunz guh goek” gyauyuz leixniemh, guhbaenz le heiqfaenh yozcenzbanh angqyangz hag Sawcuengh. Hagdangz vih gikfat gij yinxdaeuz hagseng hag Sawcuengh, gaenxmaenx haiguh hozdung lai cungj lai yiengh. Lumjbaenz: 2015 nienz 5 nyied comz lauxsae hagseng camgya Vujmingz Yen siujhagseng doeg Sawcuengh doxdax, 6 boux hagseng camgya doxdax haenx cienzbouh ndaej ciengj, ndawde Vangz Cez daengj 4 boux hagseng ndaej itdaengjciengj, Vangz Fungdanh daengj 2 boux hagseng ndaej ngeihdaengjciengj; miz 4 boux lauxsae camgya cujlauxsae doxdax, ndawde Vangz Funggyauh daengj 3 boux lauxsae ndaej itdaengjciengj, Linz Ginjfung lauxsae ndaej ngeihdaengjciengj. Hagdangz gujli bouxcoz lauxsae camgya gak cungj beizyinbanh Swcigih Gyauyuzdingh banh haenx, gungh miz 11 boux camgya beizyin, doenggvaq gaenban hagsib, saeddieg yenzsiuh、 sonhag saedguh daengj doxcaez giethab, lauxsae sonhag suijbingz miz le daezsang.

Aeundaej cingzcik gig ndei. Doenggvaq minzcuz vwnzva swnjcienz hozdung, hawj hagseng daj iq ndaej daengz minzcuz vwnzva oenqnyumx, caemhcaiq sonyinx hagseng hagsib ceiq ndei minzcuz vwnzva, hawj hagseng daj “aeu gou hag” bienq- baenz “gou aeu hag”, ceng dang boux cienzboq minzcuz vwnzva. 2014 nienz 9 nyied, fwen yenzswnghdai samsing- bouh Bouxcuengh 《Daengngoenz Benz Hwnj Bya》youz hagdangz “Lwggingloz” yisuzdonz biujyienj haenx, camgya daengx gih Vahcuengh biucinj dungxcaiz biujyienj ndaej daih’it mingz, hagdangz cauxguh gohagdangz Vahcuengh 《Hawj Lwg Mbanjcuengh Byaij Yiengq Seiq- gyaiq》 caeuq hagdangz ciet swnjcienz vwnzva Bouxcuengh gocawjdaez 《Cingz Rim Haeuxnaengj Haj Saek》 faenbied ndaej gaiq daihgouj、 daihcib daengx guek cungh siuj hagdangz ndawhag yingjsi yisuz cungjloih gim、 ngaenzciengj.