Mbouj rox boux lawz youq gyang song go faex gwnz ndoi cang aen vangx he. Aenvangx dwg yungh cag saeknamh gig saeq daeuj san baenz, mbouj yungzheih yawj ndaej ok, haujlai roeg mbin dwk mbin dwk couh bungq deng aenvangx lo, baenzlawz cukcak cungj duet mbouj okdaeuj.

Miz ngoenz ndeu, duz roegbeg- gapdoengh he mbin gvaqdaeuj, raen duzroeglaej venj youq gwnz vangx hemqcaca, gwnz vangx lij miz duz roeg bak nding bwn ndaem dai he, roegbeggapdoengh lau dwk hanhheu cungj conh okdaeuj lo. De youq henz mbin song gien le, mbin deuz lo.

Duz roegbeggapdoengh mbin ma ndoengfaex baihhenz. De heuh roeglaej、roeggacak、roegvaiqguhvaiq- guz、roegraeu daengj daeuj, de naeuz: Aenndoi baihnaj gyang song go faex miz vunz cang aen vangx he, cienmonz daeuj gaeb raeuz, ndigah raeuz itdingh siujsim bw.

Roeglaej gangj:“Dwg ha, gou miz geij beixnuengx cungj dai youq aen vangx neix lo.”

Roeggacak、roegvaiqguhvaiqguz、roegraeu caemh gangj gij sienghaih aen vangx neix.

Roegbeggapdoengh gangj: “Raeuz yaek siengj banhfap lid aen vangx neix bae.” Daihgya cungj doengzeiq.

Roegbeggapdoengh cam:“Boux lawz bae lid ne?”Daihgya mwngz yawjyawj gou, gou yawjyawj mwngz, mbouj miz boux lawz haengj bae.

Roegbeggapdoengh gangj: “Gag raeuz bae lid aen vangx neix miz di dwgrengz. Gawqyienz yienghneix, couh louz aen vangx neix youq gizhaenx ba, raeuz yaek guh haenx dwg, daj seizneix hwnj, raeuz gaijbienq diuzloh mbin raeuz, yienghneix, raeuz couh ndaej bauj aenmingh raeuz lo.” Daijgya cungj ngaek gyaeuj doengzeiq.

Sanq bae le, daihgya gak boux gag bae lwnh hawj beixnuengx、baengzyoux swhgeij, gij siusik neix boux cienz boux, seizneix, caiq mbouj miz duz roeg lawz bungq deng aenvangx neix lo.

Miz gijmaz raeuz gaijbienq mbouj ndaej haenx, couh haghag duzroeg, bae gaijbienq swhgeij ba.

(Huz Mingzbauj)