Ndwen 7, Vazcangh daihhag biz- yez lo, gagnyienh bae yozyau iq mbanjsae son saw. Vazcangh bae couh son aen ban suyoz it nienzgaep, aen ban de cij miz 30 lai boux hagseng. Yozyau iq neix liz vanzsiuj ndaw cin haemq gyae, byaij lohsaeq gemhbya aeu 30 lai faencung cij daengz.

Vazcangh bouxvunz mbouj sang mbouj daemq, byoem roi faen baenz song mbiengj. De gig maij gangjriu. Miz ngoenz he, daxmeh de doiq de naeuz:“Seiz doegsaw, byawz bang mwngz gvaq, seizneix mwngz okdaeuj gunghcoz lo, yaek rox bauqaen bw. Gaenx guhhong dem, gaej dasang lai…” Vazcangh dap:“Rox la.”

Ngoenzhaenx, Vazcangh bae cin vanzsiuj bauqdaengz. Yaucangj doiq de naeuz:“Angqcoux mwngz daeuj yozyau raeuz son saw, gizneix raeuz miz 10 boux lauxsae, cij miz mwngz dwg daihhagseng. Doeklaeng dou miz maz vwndiz mbouj rox, couh ndaej cam mwngz lo……” Vazcangh riu dwk naeuz:“Neix dwg wnggai……”

Miz dangz goq ndeu, Vazcangh son cibgeij gemj geij doiqvih gemjfap, de naeuz:“Govih mbouj gaeuq gemj, daj cibvih doiq 1, dang 10 gya soq gwnz govih bae, yienghneix liux caiq gemj. Lumj 12 gemj 7, govih 2 beij 7 siuj, mbouj gaeuq gemj, ndaej daj cibvih doiq 1 daeuj daengz govih, dangq baenz 10 doeklaeng caiq gya 2 baenz 12, 12 gemj 7 ndaej 5, yienghneix dwg cungj suenqfap ndeu; hix ndaej doiq 1 daengz govih dangq 10, sien aeu 10 bae gemj 7 ndaej 3, 3 caiq gya gwnz govih 2 yenzlaiz ndaej 5……” Seizhaenx, miz dah hagseng ndeu cam de:“Lauxsae, lij miz gij wnq suenqfap lwi?” Vazcangh gangj:“Mbouj miz lo.” Dah hagseng neix naeuz:“Miz. Boh gou son hawj gou gvaq, sien dawz soq gwnz govih doxbeij, 2 beij 7 siuj 5 roxnaeuz 7 beij 2 lai 5, ciq cibvih 1 daengz govih dangq 10, 10 gemj 5 ndaej 5, hix baenz ba?” Vazcangh dingq le, naj- mong dwk naeuz:“Baenz, baenz. Mwngz caen coengmingz! Caezgya itheij bekfwngz haenh de.”

Duenhgauj sat lo, cingzcik ban Vazcangh ndaej mingz ceiq doek- laeng, ceiq yaez lo. Gaxgonq de dasang, raen vunz hix mbouj dongx, nyinhnaeuz it nienzgaep de laepda hix son ndaej ndei. Seizneix, Vazcangh lumj aen giuznaeng baihndaw mbouj miz saek di heiq nei.

Ndwen 12, miz ngoenz he banhaemh, mbanjsae miz boux goeng- geq he dawz ceijhoengz daeuj daengz yozyau cingj Vazcangh sij fuk doiq he, de naeuz ngoenzcog lwg de yaek aeu bawx, de siengj diep youq bakdou song baih, yawj gig angqhoh. Vaz- cangh cingq gaij cozyez, baez dingq, doeksaet caez, aek diuq bubbub. De riu dwk naeuz:“Gou hong nyaengq lai, caj gou guh sat caiq sij hawj mwngz, haetcog mwngz menh daeuj aeu baenz mbouj baenz?” “Baenz a, docih mwngz, ngoenzcog bae gwn laeuj bw!” Boux goenggeq ngamq okbae yaep he, mbwn couh ci rumz doek fwn lo. Ngoenz daihngeih, mbwn gvengq lo, caezgya daeuj ranz boux goenggeq neix hoh lwg de aeu bawx, raen gij doiq bangx dou ranz de eiqsei gig ndei, cih mauzbit gig lengj. Cam cij rox dwg Vazcangh sij le, bouxboux haenh mbouj dingz bak. Vazcangh dingq le, mbouj gangj vah.

Gizgauj sat, cingzcik ban Vaz- cangh caeuq duenhgauj doxdoengz, Vazcangh daengx ndang mbouj cwx- caih.

Cuengqgyaj lo, Vazcangh ngoenz- ngoenz youq ranz yawj saw sij cih. Daxmeh gamjdaengz geizheih couh cam de:“Doegsaw dauq, mwngz gik yaek dai, vihmaz seizneix youh gaenx doegsaw moq?” “Meh, mwngz mbouj rox, haemh haenx boux goenggeq ndeu bae cingj gou sij fuk doiq he. Gou mbouj rox sij cih mauzbit, engq mbouj rox sij gijmaz youq gwnz doiq cij ndei. Gou daengx hwnz soemhfwn bae cin vanzsiuj cingj yaucangj bang gou sij ndei liux youh doq dauqma yozyau. Gwnz loh laemx geij mbat, buhvaq dumzuq liux caez, sinhoj raixcaix. Son saw buenq bi, gou cij rox, gou yienznaeuz dwg daihhag bizyez, hoeng, miz haujlai doxgaiq gou mbouj rox, lij aeu dajgoek hag hwnj cij baenz bw.” “Huk ha, mwngz mbouj rox gangj mwngz mbouj rox sij ma.” “Meh ha, daihhagseng dang lauxsae, naeuz mbouj rox sij fuk doiq ndeu baenzlawz gangj ndaej bae?” Daxmeh de naeuz:“Cihsiz laeg fouz daej, aeu laebdaeb hag cij rox gij moq, byawz hix dasang mbouj ndaej bw.” Vazcangh dingq le, ngaekgyaeuj dwddwd.