Byonghhwnz, gou caeuq baengzyoux ndei gangjgoj hix sat lo. Baihnaj dwg dennauj caepcatcat, gou lij mbouj haengj deuz bae. Siengj daengz gij goj de raemxda gou couh lae mbouj dingz. Gou caeuq baengzyoux ndei gangjgoj yienznaeuz gek aen dennauj, hoeng gou lij gamjdaengz lwgda de dwg hoengzgywggywg, ndaw lwgda hoengzgywggywg comzrim raemxda siengsim. Gou mbouj miz banhfap bae gaij gij simgiet de. Ai! Doiq moix aen ranz daeuj gangj, sienghaih ceiq hung dwg doiqfueng bae gyaez bouxwnq.

Dwg ha, boux baengzyoux mbwk gou dwg yienghneix ndei. Ndaej baenzneix gangj, dwg boux mehyah ndei、daxmeh ndei、lwgmbwk ndei caeuq bouxbawx ndei ndeu. Boux mehmbwk yienghneix ndei vih gijmaz lij youq ndaw cingzganj seiqgyaiq deng “fanci”? Nanzdauh dwg de guh loek lo? Mbouj, de mbouj caengz loek gvaq! Dwg boux gvan de loek lo—boux gvan de simlai lai. Danghnaeuz mbouj dwg boux gvan de bihaenx gouz de, danghnaeuz mbouj dwg boux gvan de gangj gak cungj vahgyaj daeuj hawj de sim- angq, boux baengzyoux gou naengz miz ngoenzneix ma?

Doiq faenh cingzganj ndaw ranz, baengzyoux ndei gou caeuq boux gvan de ceng gvaq, nauh gvaq, gou siengj mbouj doeng cungj bouxsai neix miz gijmaz ndei hawj baengzyoux ndei gou vih de siengsim? Dwg ha, mehmbwk lumj va, aeu nyinh gyaez. Cungj bouxsai neix cij naengz hawj mehmbwk siengsim, de dauqdaej miz gijmaz hawj mehmbwk louzlienh? Gou gangj, saehcingz bienqbaenz yienghneix, baengzyoux ndei gou hix miz cwzyin, couh dwg de sim’unq lai, de baez youh baez nyiuz boux gvan de. De wnggai hawj boux gvan de rox daengz sienghaih bouxwnq hix dwg sienghaih swhgeij. Swhgeij deng sienghaih couh youq gizhaenx gag daej miz gijmaz yungh, nanzdauh swhgeij couh mbouj lix ma? Aeu doiq swhgeij ndei, aeu veizhu swhgeij. Wnggai ganjcaeux couh caeuq boux gvan de doxliz bae, dauqcungz ra bouxsai gyaez swhgeij、caensim maij swhgeij ndeu daeuj itheij cingfwngz daengz geq.

Raeuz ndaej vut aicingz bae, hoeng mbouj naengz vut yinzgwz caeuq swcunh, neix dwg yiyi bouxvunz lix. Vunz aeu doiq swhgeij ndei, mehmbwk mbouj miz bouxsai ciuqyiengh lix ndaej gig ndei cij baenz. Vihliux bohmeh mwngz, vihliux baengzyoux seizseiz gvaqniemh caeuq gvansim mwngz, aeu ndeindei insik swhgeij.