Siengzlungz Siujyoz dwg Dungz- lingj Cin aen gyauyozdenj ndeu, caeuq cunghsinhyau doxgek yaek caet cienmij. Gangj aen hagdangz neix “iq”, dwg aenvih gizneix hagseng iq、saeseng noix. Aen hagdangz de cijdwg aen gyauyozdenj ndeu, cij banh 1 daengz 3 nienzgaep, cijmiz 3 aen ban, 96 boux siujhagseng, lauxsae hix ngamq miz 6 vunz. Aen gyauyozdenj neix daj 2013 nienz 9 nyied hwnj ngamq hainduj guh Cuengh Gun song saw vah sonhag.

Siengzlungz Siujyoz aen hag- dangz iq neix suenhag dauq lai gvangq, ciemqdieg 10073 bingz- fuengmij, ranzlaeuz 1216 bingz- fuengmij. Aen hagdangz iq de faex heu va maeq, gingjsaek gyaeundei, dwg aen gyoivenj lwghag baenzcaiz ndeu.“Roeglaej yienznaeuz iq, daep- daw hix miz caez”, Siengzlungz Siujyoz laeuz moq ranz rongh, banban miz bwzbanj, banban doeng gvangjbo, ranz comzsaw、ranz yawjsaw、ranz yizgi、ranz gohyoz sizyen、ranz dijyuz gicaiz、ranz meijsuz…… doenghgij doxgaiq sonhag gig caezcienz. 6 boux lauxsae bouxboux cungj dwg siujyoz gaugaep lauxsae, yozliz hix cienzbouh habgek, baihndaw miz 3 boux dwg gungcanjdangjyenz, 4 boux bwnjgoh yozliz.

Siengzlungz Siujyoz cienzmienh saedhengz gyauyuz fanghcinh, haenqrengz daezsang sonhag cizlieng, banh daegsaek siujyoz lajmbanj. Aen hagdangz iq neix dawz “gaghag、gagleix、gaggamq、gaggiengz” guh yauyin, dawz “doxgiet、vwnzmingz、haiguh、cauxmoq” guh yaufungh, dawz “yiemzsuk、 gyaezseng、guh- saed、sugson” guh gyaufungh, dawz “gaenxhag、sugngeix、gouzsaed、baenaj” guh yozfungh, yawjnaek minzcuz vwnzva gyauyuz, yawjnaek Cuengh Gun song saw vah sonhag, haeujsim hagseng fazcanj, sawj hagseng yawjraen maqmuengh, gamj- souh angqyangz.

Geij bi neix daeuj, aen hagdangz iq neix sonhag cizlieng daezsang gig vaiq, haujlai baez bingzbeij doxdax ndaej baiz youq daengx cin baihnaj, ndaej daengz vunzlai haenhndei. Dah hagseng Veiz Ciuhdingz 2011 nienz camgya daengx yienh ciengqgo doxdax ndaej ngeihdaengjciengj, 2012 nienz caiq camgya doxdax youh ndaej itdaengjciengj. 2012 nienz hagdangz bingz ndaej daengx cin sonhag guenjleix samdaengjciengj. 2013 nienz doihciengqgo hagdangz ciengjndaej daengx cin ciengqgo doxdax daihhaj mingz.

Daegbied sawj vunzlai gamj- daengz miznaj dwg, 2015 nienz 11 nyied, Siengzlungz Siujyoz daibyauj daengx yienh 74 aen gyauyozdenj ciepsouh swcigih yivu gyauyuz dox- daengh fazcanj bingzguj niemhsou. Gyoengq conhgyah cungj haenh aen hagdangz iq neix banh ndaej ndei, sonhag miz minzcuz daegsaek. Siengzlungz Siujyoz vih daengx yienh swnhleih doenggvaq swcigih niemh- sou ok rengz hung lo.

Doiq Cuengh Gun song saw vah sonhag, Siengzlungz Siujyoz boux- fucwz Luz Vwnz yienghneix naeuz:“Hagseng angq hag Sawcuengh, Cuengh Gun cungj rox ceiq ak!”