Bonjbauq siusik (gicej Luj Sauh) Gizdieg swcigih son vunz gyaez guek、dieg youq gih raeuz Dunghlanz Yen Vujcon Cin Bahyoz Cunh aen Gamj Lezningz, dwg dieggaeuq Guengjsae Nungzminz Yindung Gyangjsizsoj, de dwg aen gamjrin gag baenz ndeu, bak conghgamj miz 64 mij gvangq, 43 mij sang, ndaw gamj miz 137 mij raez, gyoebgyonj menciz miz 8000 lai bingzfuengmij. Ndaw gamj gvangqmbub ronghsag, hawqsauj bingzbwd, cang ndaej 2000 lai vunz.

Bi 1922 ndwen 3, Veiz Bazginz youq gizde cujciz gyoengq beixnuengx gwzming, fatbiuj 《Saw Lwnh Gyoengq Beixnuengx》. Bi 1925 ndwen 9, Veiz Bazginz、Cinz Bwzminz daengj youq ndaw gamj haibanh Dunghlanz Gaiq Daih’it Nungzminz Yindung Gyangjsizsoj, bi 1930 ndwen 2, Hungzcizginh ginhcangj Cangh Yinzyiz daeuj daengz Vujcon, nyinhnaeuz Veiz Bazginz youq ndaw gamj senhconz le Maj Lez cujyi, couh daezyi gaij mingz guh “Gamj Lezningz.” Bi 1962 ndwen 6 ngoenz 26, deng swcigih dingh guh swcigih cungdenj vwnzvuz baujhoh danvih, heuh de guh “Dieggaeuq Guengjsae Dunghlanz Gaiq Daih’it Nungzminz Yindung Gyangjsizsoj”. Bi 1977, swcigih bued ngaenz dauq coih Gamj Lezningz, ciuqei yienghgaeuq de daeuj coih ndei. Bi 1978, Cunghgung Cunghyangh fucujsiz Yez Genyingh sij le “Dieggaeuq Gvangjsih Nungzminz Yindung Gyangjsizsoj” geij cih saw neix, doeklaeng cuengqhung gaek youq gwnz bakgamj.

Bi 1925 seizhah, gyangjsizsoj gipyinx le Yougyangh Digih Dunghlanz、Baksaek、Hozciz、Denzdungh、Denzyangz daengj 10 lai aen yienh 270 lai bouxcoz cinbu daeuj daengz ndaw gamj hagsib. Hagsib cujyau neiyungz miz: 《Sevei Fazcanj Sij》《Ngozgoz Gwzming Sij》《Nungzminz Yindung Canghcwngz》《Cwngci Ginghciyoz Gaiyau》《Gozcifaz Caujan》caeuq 《Vunzbaz Vwndiz》daengj. Bi 1995 ndwen 12, ginggvaq swcigih dangjveij caeuq cwngfuj doengzeiq, minghmingz heuhguh Gizdieg Swcigih Son Vunz Gyaez Guek.