Vujhoz Siujyoz youq ndaw Mbanjnazduh dieg baihnamz Dungz- lingj Cin neix, liz aenhaw Dungzlingj mbouj gyae, 1956 nienz 9 nyied laebbaenz, seizneix dwg aen vanz- cienz siujyoz ndeu, banh miz 1 daengz 6 nienzgaep 6 aen ban, gungh 208 boux hagseng, hagseng daj 6 aen mbanj daeuj. Daengx hagdangz miz 12 boux lauxsae, ndawde miz song boux dwg Sawcuengh lauxsae.

Vujhoz Siujyoz mbouj gvangq, ciemq dieg ngamq 5527.3 bingz- fuengmij, suenhag haemq iq. Hoeng, aen hagdangz iq neix mbouj bingzciengz! Miz hagseng ndaej daengx gih gangj gojgaeq Vahcuengh biucinj doxdax ngeihdaengjciengj gvaq. Vunz gwnz mbanj cungj haenh aen hagdangz iq neix, haenh de dwg Mbanjcuengh “aen lwgmanh- dingjmbwn hoengzsensen”.

Vujhoz Siujyoz banhhag seizgan yienznaeuz nanz, hoeng, haiguh Cuengh Gun song saw vah sonhag ngamq daj 2013 nienz 9 nyied hainduj.

Vujhoz Siujyoz dawz “banhhag ceiq ndei、 sonhag ceiq ndei、 bohranz cuengqsim、sevei muenxeiq” guh muzbyauh banhhag, dawz daezsang cizlieng sonhag guh haedsim, haenqsim guh ndei guenjleix, dawz suenhag banh ndaej minzcuz daegsaek noengqnat, sonhag cizlieng mboujduenh daezsang.

Seizneix, Vujhoz Siujyoz laemx- sim guh godangz yaugoj ndei gaijgwz, haenqrengz guh Cuengh Gun song saw vah sonhag, beizyangj hagseng cienzmienh fazcanj. “Gaenx guh couh ndaej souhaeuj lai”, Vujhoz Siujyoz saeseng caezsim roengzrengz, gak fuengmienh cingzcik cungj haemq ndei. Dungzlingj Cin moix aen haggeiz guh sonhag cizlieng genjcwz, Vujhoz Siujyoz cungj baiz baihnaj daengx cin. 2013 nienz caeuq 2014 nienz, roeknienzgaep hagseng camgya Laizbinh Si siujyoz bizyez suijbingz caeksawq, gonqlaeng ceng- ndaej daengx yienh itdaengjciengj caeuq ngeihdaengjciengj. 2013 nienz bingz ndaej Laizbinh Si yivu gyauyuz ciengzgvi guenjleix youhsiu hag- dangz; doengz bi youh bingz ndaej “lauxsae cwngzcangj nienz” caeuq“ndwen gyaez gohyoz” senhcin cizdij.

Daegbied ndaej daengz vunzlai haenh ndei dwg, Vujhoz Siujyoz 2013 nienz ngamq hainduj guh Cuengh Gun song saw vah sonhag, 2014 nienz dah hagseng Hoz Gveiyinz camgya daengx gih gangj gojgaeq Vahcuengh biucinj doxdax cengndaej ngeih- daengjciengj.

Yaucangj Cinz Sannaz youq gwnz daihoih daengx hagdangz gangj: “Vujhoz Siujyoz raeuz youq Mbanjcuengh, Cuengh Gun song saw vah sonhag gig hab hagdangz raeuz, raeuz itdingh aeu laemxsim guh roengzbae, guh ndei bae!”