1 nyied 1 daengz 3 hauh, Gvangjsih Minzcuz Dayoz Vwnzyozyen 19 boux hagseng Banvahyauz 2015 gaep, youz Vwnzyozyen Cungguek Saujsu Minzcuz Vahgangj Vwnzyoz Hi cujyin Gangh Cunghdwz daiq doih, ndaej daengz iucingj, bae Baksaek camgya gaiq daih’it Cungguek Baksaek ciet gozci Yauzcuz vwnzva lijyouz. Youq seiz 3 ngoenz cazyawj hagsib, hagseng Banvahyauz camgya le go gagsij Yauzcuz doxdax、 Yauzcuz swnghdai diuqfoux doxdax caeuq Gvangjsih Yauzyozvei nienzhoih nem Aen Hoih Yenzdauj Saenamz Yauzcuz Lizsij Vwnzva, doengzseiz bae Baksaek Gijyi Geiqniemhguenj ngonzyawj hagsib.

Cungguek Saujsu Minzcuz Vahgangj Vwnzyoz conhyez dwg aen daegsaek conhyez Gvangjsih Minzcuz Dayoz he, youq Vahcuengh giekdaej baihgwnz, bi 2015 gyalai le Vahyauz caemhcaiq baez daih’it ciusou hagseng. Gvangjsih Minzcuz Dayoz Vahyauz conhyez dwg seizneix daengx guek dandog aen bwnjgoh conhyez hailaeb Vahyauz gocwngz he, muzdiz dwg gungganq cienmonz vunzcaiz cingdoeng vah saw Yauzcuz, fugsaeh gizdieg minzcuz ginghci、 gyauyuz caeuq vwnzva daengj hwnjguh. Baez cazyawj hagsib neix hawj gyoengq hagseng aeu saedsaeh hengzdoengh gyahaeuj hengzguh hozdung, caenndang roxyiuj gij yinxdaeuz vwnzva Yauzcuz, gikfat le gyoengq hagseng gij yiedcingz hag ndei conhyez cihsiz, vih doicaenh Vahyauz conhyez hwnjguh、 baujhoh caeuq swnjcienz vah Yauzcuz vwnzva dwkroengz giekdaej youqgaenj.

(Lanz Swng/蓝 盛 Loz Diyungz/罗帝荣)