“Baenzlawz ndaej caeuq boux- wnq doxbeij ne! Vahsug gangj‘Vunz beij vunz, hozhwnj yaek dai.’” Siuj Vangz naeuz, “Ndwen neix 16 hauh, gou dawz ci bae meijyungz, mwngz naeuz boux lauxbanj aencangj coih heiqci dwg byawz a! Yenzlaiz dwg boux hagseng gou, de doeg daengz 8 nienzgaep yozgiz daih’it caengz liux couh okbae dajgoeng lo, cij 4 bi lai couh ndaej dang lauxbanj lo. Mwngz yawjyawj, gwnzbiengz seiz- neix fanj doxdauq lo, boux mbouj doegsaw ndaej dang lauxbanj, canh ndaej haujlai ngaenz, saedceij gvaq ndaej beij boux doegsaw maenh haenx ndei.”

Laux Vangz okbae le, siuj Vangz couh aeu aen bak de dam haeuj goekrwz gou naeuz:“Laux Vangz dwg boux siujyoz sij gangjbanj ndeu, aenvih de sij ndaej fwngz cih gangjbanj ndei, yangh cwngfuj yaek aeu boux guhsaeh ndeu, laux Vangz couh ndaej diuh hwnjbae dang misuh lo. De roengzrengz guhhong, cwngzciz gig ndei, gvaq song sam bi couh ndaej daez hwnjbae guh fuyanghcangj. Mehyah de vunz geq ndang miz bingh, naxngeih de ciengzciengz bae ciuqgoq mehyah de. Moix baez laux Vangz bae ranz, de mbouj dwg bae yawj mehyah de, dwg bae yawj naxngeih de. De bae yawj naxngeih de danghyenz mbouj miz gij saeh ndei lo! Lajmbwn mbouj miz faqciengz lawz mbouj doeng rumz. Gvaq mbouj ndaej geijlai nanz, miz vunz gauq daengz yanghfuj bae. Yanghfuj couh baij vunz bae diucaz. Gvaq cawz he, laux Vangz deng roengz daengz Yienh Samcungh. Yanghfuj hawj najmienh de gig hung ha! Hoeng, duzma gaij mbouj bae aen sibgvenq gwnhaex. De aeu son saw guh lijyouz, ciengzseiz heuh gyoengq hagseng mbwk doegsaw mbouj ndaej ma ranz de bae son. Mwhhaenx, ranz laux Vangz ciengx miz duzrwi, couh miz haujlai dangzrwi. De hawj hagseng mbwk gwn raemx dangzrwi. Baez daih’it mbouj sug, baez daihngeih couh sug lo. Laux Vangz youh nem hwnj hagseng mbwk. Doeklaeng, laux Vangz youh deng vunz gauq, ndigah de youh deng gyangqciz, roengz daengz aen cunghyoz raeuz daeuj. Binjdwz de cibfaen mbouj ndei, ciengzciengz deng vunz aeu de bae guh laeh gangjriu.

Youq gwnzbiengz gijmaz saeh cungj miz, cijmiz gij saeh mwngz siengj mbouj daengz, mbouj miz gij saeh vunz guh mbouj daengz. Byawz rox, bi’gvaq gij cizcwngh laux Vangz gawqyienz bingz ndaej hwnjbae lo. Byawz hix siengj mbouj daengz, gij cizcwngh de ndaej faen ceiq sang, gyoengq bingzveij bouxboux dajfaen sang hawj de caez.

Doeklaeng miz boux bingzveij he gangj gij mimiz ndawde okdaeuj hawj dou dingq — laux Vangz laebdaeb 11 bi bingz cizcwngh, gij dangjan de youq ndaw si rom hwnjdaeuj dwg boux ceiq sang. Boux bingzveij najdoiq gij dangjan laux Vangz, gig youhmwz dwk naeuz:“11 bi ne! Gyoengq beixnuengx, 11 bi ne! Guekgya raeuz dwk Yizbwnj cij aeu 8 bi, couh gyaep bing Yizbwnj dauqbae ranzcoj de lo. Gaijfang Cancwngh cij yungh 3 bi lai, couh hawj laux Ciengj ndoj haeuj Daizvanh bae lo. Hoeng, 11 bi neix daeuj, laux Vangz cungj mbouj vutvat, fazyangz gij cingsaenz gwzming, bibi bauq- mingz bingz cizcwngh……Caen dwg nanzvi de lai lo, bineix lij mbouj hawj de bingz ndaej, caen dwg doiq mbouj hwnj de bw!” Gij vah boux bingzveij neix, hawj gyoengq bingzveij wnq youq ndaw bangunghsiz haenx, bouxboux danqheiq raezraez, mbouj miz byawz gij saek aennaj mbouj bienq!

Bingz cizcwngh aeu bae bungq- bungq seizheiq, caen mbouj dwg gyangngoenz loq fangzhwnz bw! Siengj daengz gizneix, danghnaeuz laux Vangz dingq gij vah siuj Vangz mbouj bauqmingz dahraix, gij cizcwngh de hix mbouj ndaej lo! Doeklaeng gou caeuq siuj Vangz mbouj miz saek di naj bae raen laux Vangz. Moix baez bungq daengz laux Vangz, dou song boux youq giz gyae’gyae couh ndoj deuz lo, lumj duznou raen duzmeuz nei.

(sat)