——Ginhcouh Si Ginhbwz Gih Nazmungz Cin Bingzfuz Siujyoz Daegsaek Banhhag Geiqsaed

Ginhcouh Si Ginhbwz Gih Nazmungz Cin Bingzfuz Siujyoz dwg aen cunh gaep siujyoz youq dieg Bouxcuengh comzyouq he. Aen hagdangz neix dwg Cuengh Gun song saw vah sonhag saedniemh siujyoz. Hagdangz daj laebbaenz daeuj, giendingh “sam aen mienhyiengq” banhhag fuengyiengq, ciuqei vah- daengq “gohyoz、 gveihfan、 roengz- rengz baenaj、 cauhmoq” hagdangz, mboujduenh bae guh gyauyuz gaijgwz, cienzmienh hengzguh suciz gyauyuz. Hagdangz hengzguh lohnaemj “miz dwz caiq doegsaw, son guh vunz caiq sonsaw” guh hong, hengzguh “aeu Cuengh guhcawj, Cuengh Gun giethab, aeu Cuengh coi Gun, Cuengh Gun caez rox” “cibroek cih” sonhag fuengcim, caensim fugsaeh hagseng, fugsaeh gwnzbiengz, haifat le lwgnyez Bouxcuengh caiz- hag, gyauyuz sonhag cizlieng bi sang gvaq bi.

Bingzfuz Siujyoz roengzsim dajcaux aen doih lauxsae suciz sang he, aeu gaijgwz、 cauhmoq leixniemh guenjleix ndei hagdangz. Hagdangz miz 17 boux lauxsae, ciennyaemh lauxsae habgek 100%, ndawde siuj- yoz gaugaep lauxsae 8 boux, siujyoz itgaep lauxsae 9 boux, Guengjsae lauxsae Sawcuengh boux mizmingz beizyin doiqsiengq 1 boux. Hagdangz seizneix miz 10 aen ban, gungh 364 boux hagseng, cienzbouh dwg Bouxcuengh.

Ciuq saedcaeq dangdieg, gaenx- maenx onjdangq haiguh Cuengh Gun song saw vah sonhag. Bingzfuz Siujyoz sawjyungh Cuengh Gun song cungj saw guh sawson, sonhag yungh Vahcuengh caeuq Vahgun song cungj neix, Cuengh gonq Gun laeng, aeu Cuengh coi Gun, Cuengh Gun giethab, muzdiz dwg youq hag ndei Sawcuengh Vahcuengh giekdaej, daezsang Sawgun Vahgun suijbingz, ndaej daengz Cuengh Gun cungj rox muzbyauh. Gaenxmaenx damqra song saw vah sonhag vunqsik hab dieg Bouxcuengh gyauyuz saedcaeq neix. Cauhmoq gyauyenz hingzsik, guh- baenz aeu “saiq” coi “yenz”, aeu “yenz” coi “son”, “saiq、yenz、son” giethab Cuengh Gun song saw vah sonhag gyauyenz vunqsik moq. Haiguh hong beizyin gungganq song saw vah lauxsae lai caengz、lai cungj hingzsik, daezsang song saw vah lauxsae yezvu suciz.

Song saw vah sonhag cingzyauq ndei. Bingzfuz Siujyoz youq seiz sonhag giendingh hengzguh song saw vah sonhag fuengfap, son Sawcuengh gonq, caiq son Sawgun, baetsauq le hagseng vah gangj caeuq swhveiz gitgaz, coicaenh hagseng vah gangj caeuq swhveiz naengzlig daezsang, daezsang le hagseng hag ndaej cihsiz naengzlig. Hengzguh song saw vah sonhag miz cingzyauq: Luz Yenyen doengzhag camgya bi 2008 Guengjsae siuhagseng gangj gojgaeq Sawcuengh doxdax ndaej youhsiuciengj; Maj Siujli doengzhag camgya bi 2011 Guengjsae siuhagseng gangj gojgaeq Sawcuengh doxdax ndaej youh- siuciengj; Vangz Siujlinz daengj 5 boux doengzhag camgya bi 2012 Guengjsae siujhagseng Sawcuengh dungxcaiz biujyienj ndaej sam- daengjciengj; Luz Liengmeiz lauxsae camgya bi 2010 Guengjsae Cuengh Gun song saw vah lauxsae gangjsaw doxdax ndaej samdaengjciengj; hagdangz ndaej bi 2012 nienzdoh si gaep lauxsae laebdaeb gyauyuz senhcin cizdij; song saw vah sonhag goqdaez yenzgiu cingq guh ndaej swnhsed.

Yienghgeng cungcuk, fugsaeh sonhag. Bingzfuz Siujyoz boiqbwh miz lai cungj meizdij sonhag sezbei caeuq lauxsae ranzbeigo daengj vangjloz sezsih, caeuq buek doxgaiq gohyoz sawqniemh he, cingjhab giethab gak goh gocwngz swhyenz, gaenxmaenx damqra caeuq cauxmoq hagdangz Cuengh Gun song saw vah sonhag fuengfap moq, vih doicaenh Cuengh Gun song saw vah sonhag guh ndaej swnhleih daezhawj aen bingzdaiz ndei he.