Sihsanghbanjnaz Swcicouh, dieg youq gok baihnamz Yinznanz Swngj, baihdoengnam、baihnamz caeuq baih saenamz faenbied caeuq Laujvoh、Menjden bya raemx doxlienz, depgyawj Daigoz caeuq Yeznanz. “Sihsanghbanjnaz” hoiz baenz Vahcuengh dwg “cib song cien naz”, eiqsei dwg cibngeih cien gaiq naz, saedcaeq dwg cibngeih giz ranghdieg hingzcwng beij yienh iq di he. Sihsangh- banjnaz ciuhgeq caemh heuhguh “Mungbahlahnazsih”, eiqsei dwg “gizdieg angqyangz vuenyungz saenzgeiz caiqlij ceiqndei”, gij gingj sengcingz ndoengfaex ranghhwngq caeuq fungsug fung- cingz saujsu minzcuz riuzmingz daengx biengz, lij riuzcienz miz duzciengh、 roeggungjcoz、faex- muenghmbwn doenghgij gojgaeq ndawbiengz ndei dingq haenx. Vihliux lai rox sengjgih minzcuz beixnuengx baenzlawz banh bauq ndei, caeuq bauqceij、vangjcan Sawdaij lai doxgyau doxrox, cam aeu gij gingniemh 《Sihsangh- banjnaz Bau》vangjcan guh yizdung hulenzvangj APP gwzhudonh haenx, ndwen neix ndawcib, bonjbauq caijfangjcuj gungh 3 vunz bae daengz 《Bauq Sawdaij Sihsanghbanjnaz》benhcizbu dox- gyau hagsib.

《Bauq Sawdaij Sihsangh- banjnaz》youq bi 1957 ndwen 3 ngoenz 4 cauxlaeb, ndawgyang nauh “vwnzgwz” gonqlaeng dingz banh 3 baez, seizneix dwg yungh Sawdaij moq moix aen singgeiz ok geiz doiq hai seiq banj ndeu, cwngfuj caizcwng moix bi ok ngaenz 20 fanh maenz cawx soengq bauqceij hawj bouxdoeg yawj. Bauq Sawdaij daj laebbanh gvaqdaeuj, baenzbaenz cungj vih seveicujyi fuzvu, vih beixnuengx minzcuz fuzvu, senhconz ndei fuengcim cwngcwz dangj raeuz, soncienz saenqsik caeuq gohyoz vwnzva cihsiz, vih demgiengz minzcuz doxgiet、henhoh henzguek onjdingh、gyahung doiq rog haicuengq guh le haujlai saeh mizik, aeundaej sevei yauqik gig ndei.

Daj bi 1996 hainduj, Sih- sanghbanjnaz Bause caeuq Veiz- fangh Bwzda Cinghniuj Vazgvangh Ciuqbaiz Mizhanh Gunghswh doxgap guh Sawdaij bienmax cangsawfuk yenzgiu、Sawdaij comzcih yenzgiu、Sawdaij dwkcih gisuz yenzgiu、Sawdaij baizbanj gisuz yenzgiu doenghgij hong Sawdaij suswva neix; 2008 nienz guhbaenz Sawdaij sinhvwnz vangj- can hidungj, bi 2009 ndwen 11 co guhbaenz haidoeng Sawdaij sinhvwnz vangjcan “Aenvangj Sawdaij Sihsanghbanjnaz”, faen guh Sawdaij moq caeuq Sawdaij gaeuq song aen vangjcan, hawj Sawdaij Sihsanghbanjnaz byaij hwnj diuzroen vaiqriengj saenqsik ndeu, baenzneix couh cauxok le “haj aen daih’it”: Couhdwg Cungguek aenvangj Sawdaij daih’it; Cungguek aen daih’it Sihsanghbanjnaz Sawdaij moq Sawdaij gaeuq sinhvwnz caijbenh hidungj bingzdaiz; Cungguek faenh bauqceij suswva daih’it Sawdaij Sihsanghbanjnaz; Cungguek aen daih’it Sihsanghbanjnaz Sawdaij vangjloz sibinz bingzdaiz; Cung- guek aen daih’it Sihsanghbanjnaz Sawdaij vangjloz swnghbinz bingz- daiz. Aen bause neix lij cingjhab yungh ndei Sawdaij gisuz bingzdaiz caeuq Sawgun gisuz bingzdaiz, guh daengz doxdoeng doxlienz, saed- yienh Sawgun caeuq Sawdaij gisuz bingzdaiz doxcaemh yiengjsouh gij swhyenz de, haifat ok Sawdaij moq、Sawdaij gaeuq caeuq Sawgun soujgih APP gwzhudonh, caemh- caiq youq bi 2014 ndwen 12 ngoenz 12 cingqsik hwnjsienq fatbouh, hawj gyoengq beixnuengx Daijcuz ndaej aeu soujgih ma yawj sinhvwnz hag gohyoz vwnzva cihsiz Sawdaij.

“Banjnaz dou miz haujlai beixnuengx, aenranz de mbangj ranzdajcawj aiq youq guekrog, rugninz cix youq ndaw guek. Gyoengqde couhdwg guekcoj raeuz bouxbingsauq henz gyaiqguek, danghnaeuz mbouj miz gyoengqde hengaenj dieggyaiq henzguek, couh mbouj miz gij an’onj saedceij daengx guek yinzminz; dou dangguh vunzguhbauq henzguek laemxsim caenhrengz banh ndei faenh bauqceij saw minzcuz, hix couhdwg henmaenh henzgyaiq vwnzva guek- coj, yienghneix cij ndaej miz gij ancienz vwnzva yinzminz guekcoj raeuz.” Sihsanghbanjnaz Bause fucungjbenhciz Yi Ganghlungz youh gwnz hoih doxgyau naengh- damz gaisau gij cingzgvang mizgven bauq Sawdaij seiz cingz naek vah caemq dwk gangjnaeuz, caemh hawj dou roxyiuj lailai siengjngeix lailai.