Mbanjsangdonz miz boux goeng- geq ndeu heuhguh Sizyangz, bineix 70 lai bi lo, ndang lij gig cangq. Yienznaeuz ndang naiq di, hoeng guh hongnaz mbouj beij gaxgonq yaez. Sizyangz miz song daeglwg dang ganbu, gaenq couxbawx hix miz lwgnyez doeg suijyoz lo. Gaxgonq, Sizyangz gvanbaz vihliux song lwg neix baenz caiz, gwn haujlai haemzhoj gvaq, lae haujlai lwedhanh gvaq. Haj bi gonq, yah Sizyangz gvaqseiq lo. Seizneix Sizyangz wnggai naengh gwn yiengjfuk caeuq bae youz gwnzbiengz lo. Hoeng, de lij youq ranzmbanj guh hong naz dem, nyengh mbouj nyienh bae caeuq lwglan gvaq saedceij.

Geij bi gonq, lwg Sizyangz Ahdaih、Ahngeih raen daxboh mbouj haengj bae caeuq song boux de youq, couh geiq ngaenz dauq hawj daxboh. Sizyangz sou daengz ngaenz le, youh dawz dauq daeuj hawj songde, lij naeuz:“Gou guh naz souhaeuj lai, sou gunghswh mbouj sang, yaek aeu ngaenz ciengx ranz.”

Miz song mbat, song lwg neix haici dauq ranzmbanj nyengh rag Sizyangz bae caeuq song boux de youq. Sizyangz youq ndaej sam ngoenz, couh guhcaeg dauq ranzmbanj lo. Song boux lwg de hoz gig ndat, couh mbouj leixlangh Sizyangz, caih de siengj baenzlawz guh couh baenzde guh.

Yienghneix gaenh sam seiq bi gvaqbae, gyoengqvunz doiq ranz Sizyangz gangjfaenfaen. Mizmbangj naeuz, faex hung ndaej gang raemh, Sizyangz caen mbouj rox yiengjfuk. Mizmbangj naeuz, bohlwg seiq neix mbouj caemhgya, seiqlaeng doxra mbouj doxdoiq bw. Mizmbangj gangj, song daeglwg de seizneix soeng lai lo, mbouj yungh geiq ngaenz dauq, mbouj yungh haici ma, mbaet ndaej haujlai ngaenz; hai, miz vunz cungj dwg daengz lwg siengj ciengx bohmeh gaenq mbouj lix, cij ienqhoij hane. Hix mizmbangj vunz naeuz, mbouj hauqgingq bouxlaux, gangj mbouj ndaej maij guekcoj maij lwgminz bw……Lumj gij vah saeb cienz haeuj rwz Ahdaih caeuq Ahngeih bae, songde roxnyinh gij vah neix hix miz dauhleix. Hoeng songde doiq daxboh youh fouzfap, cij ndei youz vunzwnq gangj gijmaz cungj ndaej.

Bineix ciet gozging, beixnuengx song ranz vunz dauq ranzmbanj caeuq daxboh gvaq ciet. Ndaw geij ngoenz gyaj, song beixnuengx neix gag dawz noh caeuq laeuj dauq, bae caeuq beixnuengx ndaw mbanj nyaem, angq dangqmaz.

Ngoenzgyaj daihcaet banhaemh, Ahdaih caeuq Ahngeih caeuq gyoengq beixnuengx sij mbouj ndaej doxliz, hoeng hix ngaiz dauqbae danvih lo.

Ngoenzgyaj daihbet haetcaeux, Sizyangz siengj bae cae reih, de bae raen ndaw rienghcwz hoengqhang- hang, de aek diuqbubbub. De bae aen ranz cuengq cae rauq baez yawj, doeksaetyat, gijmaz hongdawz fouz fwed gag mbin deuz lo. De vueng ndaej daihsing swenj hwnjdaeuj:“Miz vunz caeg cwz la……”

Gyoengq vunzmbanj comz daeuj lo, mizmbangj ndaq bouxcaeg, miz- mbangj riuhoho:“Cwz deng caeg bae lo, baenzlawz guh reihnaz?” Sizyangz sek naeuz:“Sou mbouj bang gou bauqanq, lij riu gijmaz?” Miz yah ndeu naeuz:“Daxgoeng, haemhlwenz mwngz gwn laeuj fiz ninz ndaek lai lo, lwg mwngz gaenq dawz cwz caeuq hongdawz mwngz gai hawj dou liux lo. Gij reihnaz ranz mwngz cwngzbau haenx, song boux de hix cienj hawj dou guh lo. Baengzgawq youq ndaw fwngz gou, song boux de lij louz miz fung saenq he hawj mwngz dem.” Yah neix gangj sat, couh dawz baengzgawq caeuq saenq ndenq hawj Sizyangz. Sizyangz heiqhwnj fofo, hai saenq daeuj yawj: Daxboh, lwg mbouj hauq, mbouj caeuq mwngz doxyaeng couh gai cwz gai cae rauq mwngz bae liux. Bak sienh hauq daih’it. Daj ngoenzneix hwnj, cingj mwngz gaej guh hongnaz lo. Mwngz rox dajsan, henz ranz nuengx miz aen diemq dajsan ndeu, naengh mwngz daeuj caeuq nuengx youq, mbouj miz maz guh, ndaej bae ndaw diemq lienh dinfwngz. Naengh mwngz daeuj caeuq daeggo youq, gaenh ranz go miz aen gunghyenz ndeu, ndawde miz haujlai doenghyiengh lienh ndang, mwngz ndaej bae ndawde lienh ndangdaej, caeuq gyoengq bouxlaux guhcaemz gangjgoj. Mwngz lij youq ranzmbanj, dou song beixnuengx moix ndwen daiq lan doxlawh dauqma yawj mwngz mbat ndeu. Neix youz mwngz senj……Sizyangz yawj gvaq fung saenq neix liux, gikdoengh dangqmaz: Mbwn ha! Dwg bae daiq lwglan roxnaeuz lij laebdaeb youq ndaw ranzmbanj ne……