Vujmingz Yen Sanghgyauz Cin Yangzlij Cunh lizsij nanz raeuh caiqlij miz gwzming conzdungj dem. Geijcib bi neix daeuj, cunh dangjcihbu nem cunhveij ganbu daiqlingx vunzmbanj byaij diuz roen baenz fouq, ndaej baenz Vujmingz Yen gij mbanj fouqmiz ndawde aen ndeu. Geij bi gonq, Yangzlij Cunh youh baenz le Vujmingz Yen seveicujyi lajmbanj moq gensez sifan diemj, gyoengq vunzmbanj engq haenqrengz bae guh, daengx mbanj bienqvaq hungloet, yinx vunz cimyawj.

Yangzlij Cunh youq dieg baihdoeng Vujmingz Yen Sanghgyauz Cin 3 goengleix gyae haenx, miz 4 aen mbanj 7 aen cunhminz siujcuj, gungh miz 288 hoh 1167 boux vunz, ndoengfaex mienhcik 3800 moux, reihnaz mienhcik 1300 lai moux, gomak 2500 lai moux, ndawde makgamdiengz 800 lai moux, makdauzmaed 700 lai moux, maknganx 600 lai moux, 2010 nienz daengx mbanj moix vunz bingzyaenz souhaeuj couh daengz 6580 maenz. Aen cunh neix gonqlaeng ndaej “daengx guek cunhcin gensez vwnzmingz mbanj”、 “daengx guek minzcuz doxgiet cinbu senhcin cizdij”、 “daengx guek ginhgoz sifan cunh”、 “daengx guek mozfan cunh- minz veijyenzvei”、“cauxlaeb guekgya gaep vwnzmingz cunh senhcin danhvei” daengj mingzdaeuz ndei.

Daj 2008 nienz gvaqdaeuj, vunz Yangzlij mbeilaux diuzcingj dajndaem gezgou, byaijok diuz roen “dajciengx—caujgi—ndaem mak” ndaej laebdaeb hwngfat swnghdai nungzyez, daj gaxgonq dandog ndaem haeuxnaz, seizneix guhbaenz ndaem miz haeuxnaz cauhgiz、maknganx、makgamdiengz、makdauzmaed、hoj- lungzgoj caeuq seizdoeng maenz- doengzlingz mbouj yungh cae ndai daengj, saedyienh fouzgoenghaih swnghcanj. Doengzseiz gauq gohgi, laebguh swnghdai nungzyez binjbaiz, coicaenh nungzyez hwngfat, nungz- minz demsou. Aen mbanj neix lij gauq 2000 lai moux seiqgeiq swnghdai lwgmak, haifat nungz- gyahloz lijyouz comz nungzyez lijyouz、saedceij daejniemh、saekloeg gwnndoet、youq lajmbanj gvaq ngoenzgyaj daengj， hawj hekyouz ndaej youq Yangzlij mbaet mak、yawj gingjsaek、epbya、gangqring、cimz byaek lajmbanj, mboujduenh hwngfat “nungzyez + lijyouz” canjnieb. 2010 nienz Yangzlij Cunh swnghdai soengswt nungzyez cunghhoz yauqik ndaej 500 fanh maenz, ciemq nungzyez cungjcanjciz 60% dox- hwnj.

Yangzlij Cunh gauq gij ndei lijyouz swhyenz bya heu raemx saw, vanzging gyaeundei de, gyarengz guh ndei gij yienghsiengq aenmbanj, moix ranz ciuq honghseiqcingq biucinj guh ranz, moix hoh ciemq dieg 338 bingzfanghmij、moix aen ranz gek 3.3 mij, honghmbanj gvangq 5 mij, mbanj nem mbanj、hoh nem hoh doeng roen suijniz, gij roen youh soh youh ndei. Aen mbanj neix roengzngaenz cizdij ginghci gaenh bak fanh maenz guh “yiengh suenva” gaijcau, vwnzva gvangjcangz、daiz- heiq、vwnzvasiz、dwnghgvangh giuzcangz yienghyiengh cungj miz, fungfouq saedceij cunhminz; ndaw mbanj laebbaenz nungzminz vwnz- yidui, gvaq cieng gvaq ciet，nungzminz vwnzyidui yienjheiq seiz, cungj raen miz gyagoeng caeuq lwgbawx、 daeglwg caeuq daxmeh caemhdaiz yienjheiq. Vunzmbanj gangj: Gij simmuengh geij daih vunz aen laeuz baihgwnz baihlaj, ndaw ranz miz denva; haici cunz baengzyoux caencik neix, seizneix youq aen mbanj dou cungj ndaej saedyienh liux.