Bineix ngoenz “6·1” ciet lwg- nyez, ndaw hagdangz geizcaij mbinyangyang, gyoengq doengzhag angqvauvau. Dou daeujdaengz ndaw cauhcangz cizhoz le, yaucangj gangjvah naeuz: “Gyoengq doengzhag, hoh daihgya ngoenzciet angqyangz. Ngoenzneix, raeuz yaek gawjhengz youzyenz hozdung, goemqda roqgyong hozdung youq laj daizheiq gawjhengz, boq labcuk hozdung youq ndaw ngeih it ban gawjhengz, aencaw gwnz fwngz hozdung youq laj go’gyaeuq gawj- hengz……” Gangjsat, yaucangj senh- bu hozdung hainduj. Yaucangj vah ngamq gangj sat, gyoengq doengzhag couh lumj duzrwi ok rongz nei yiengq seiqhenz sanq bae.

Gou sien bae guh goemqda roqgyong. Hozdung gvicaek dwg: Sien aeu gaiqbaengz goemq doiq da, ndaw fwngz gaem mbaenq faexgyaengh he, byaij bae baihnaj haenqrengz roq aen- gyong, roq deng couh ndaej hingz. Gou boux daih’it bae roq, gou goemq ndei doiq da le, cij gamjdaengz laep- ngaungau, gou byaij baenaj, maq- muengh roq ndaej deng, hoeng byawz rox byaij mbieng lo, mboujdanh roq mbouj deng, vanzlij bungq deng ciengz dem, yinx daeuj gyoengq doengzhag riuhaha. Yienznaeuz gou mbouj ndaej hingz, hoeng ndawsim gou angqvauvau, aenvih gou gamj bae guh.

Guh gvaq goemqda roqgyong mizyinx le, gou youh bae guh hozdung boq labcuk. Bae daengz giz dieg boq labcuk, gizde vunz gig lai, aendoih baiz ndaej lumj duzlungz raezrangrang nei. Gou hix baiz youq baihlaeng gyoengq doengzhag. Caj haujlai nanz cij daengz gou. Gou bae daengz henz labcuk, hag yiengh gyoengq doengzhag, haenqrengz sup gaemz heiq ndeu, caiq yungh rengz boq, hoeng gou ngamq boq ndaep song diuz labcuk diemj dawz feiz haenx. mboujgvaq lauxsae hix ciengj hawj gou song aen bingj caeuq song naed dangz.

Ciepdwk gou youh bae guh hozdung aencaw gwnz fwngz. Hozdung aencaw gwnz fwngz gvicaek dwg: Cuengq aen binghbanghgiuz youq gwnz bekgiu, youq baihneix byaij bae daengz baihhaenx, mwh byaij mbouj ndaej aeu fwngz rex aengiuz, mbouj ndaej hawj binghbanghgiuz youq gwnz bekgiuz haenx doek roengzdaeuj. Gou byaij gvaqbae, yawjraen doengzhag gou Lij Mingz gaenq hwnj ciengz lo, de fwngz gvaz gaem aen bekgiuz, gwnz bekgiuz cuengq aen bingh- banghgiuz saekhau ndeu, fwngzswix siengj bae rex aengiuz. Aen bak de mbwnj hwnj, doiq da byaengqbyatbyat yawj aengiuz. Yawj yiengh de gig lauheiq aengiuz daj gwnz bekgiuz doek roengzdaeuj. De siujsim sisi dwk yiengq diegdaemx byaij bae, it yamq, song yamq……de gig dwgrengz byaij daengz diegdaemx lo. De angq dwk diuq hwnjdaeuj, angqvauvau bae lingx ciengj lo.

Seizgan gvaq ndaej gig vaiq, cuengqhag lo, gyoengq doengzhag lij sij mbouj ndaej baema. Gou maqmuengh bilaeng “6·1” ciet lwgnyez vaiq di daeujdaengz.

（指导老师: 覃红梅）