(ciep geiz gonq）

Mwngz, dwg bouxvunz gou ndaej niemh baenzlai nanz, yienznaeuz cijdwg caemcingx dwk muengh, couhsuenq mbouj miz gijmaz vah gangj. Dou gawq lumj song boux vunzseng cix gig sug, youh lumj song boux vunzsug cix gig seng. Gvendaengz aicingz, sojmiz cajdeq cungj dwg dij, couhsuenq dwg gag luq swhgeij.

Cungj naeuz bouxcoz guhyoux mbouj ndaej nanz, hoeng, youh dwg byawz hawj faenh cingz neix roengznamh?

Mwngz caeuq gou roxnaj daengz guhyoux mbouj mauhgvaq 15 ngoenz, vah mwngz caeuq gou doxlwnh mbouj miz 20000 cih, hoeng, gojsaeh gou geiqloeg gvendaengz mwngz miz 140 bien、200000 cih.

Baihbaek

Baihbaek dwg aen singz gou youq, mbouj miz haij, mbouj miz va, cij miz ngaeuzlaeng gou gig gadog.

Gou maij baihbaek gou, de dwg dieg ciengx gou. Geijlai bi gou caeuq baihnamz lumjbaenz cij dwg yungh soujgih caeuq dennauj daeuj gyauhliuz, mbouj miz mbaw cibiuq baedauq, saeh neix hawj gou cibfaen siengsim.

Caeuq mwngz doxbiek liux, bien faenzcieng gou daengz seizneix cungj mbouj caengz raiz liux, fouzsoq aen gyanghwnz gou cungj mbouj rox yienghlawz bae raiz.

Gizsaed, gojsaeh lij laebdaeb fazcanj roengzbae, gou gag ciengq go, youq laj daeng loh saekrongh henj byaij, ndaw fwngz dawz aen bingzlaeuj hoengq ngauz bae ngauz dauq……

Va hai youq seizhah gvaq buenq mwngz seiz, miz rumz iq cifedfed, miz bouxvunz gou gyaez.

Gou laebdaeb gangj gojsaeh gou, mwngz laebdaeb dwg cawjgiek gij gojsaeh gou gangj.(sat)