Ngoenzciet cuengqgyaj, gou daengx ranz vunz bae Cingsih cetyouz, caeux couh dingqnyi singz- geq Giucouh daegsaek Bouxcuengh naekgywg bya raemx gyaeundei, ngoenz he banringzgvaq couh hai ci bongh coh Giucouh.

Dingz ci youq bakgai byaij haeuj Gai Giucouh, caenh raen diuzgai aeu benjrin bu ndaej bingzbwd, caemh- caiq seuqcingh dangqmaz, baenz aen baenz aen ranzcanx benjfaex daengj youq song henz gai, bakdou ranzranz cungj venj miz aendomq saeknding saekhenj daengj baengzcouz lai cungj saek siuqseuj baenz haenx, hawj vunz miz cungj sim doengh ndeu. Menhmenh swnh gai byaij baenaj, raen haujlai mehmbwk dahsau lijmiz naihlaux dem roxnaeuz gag boux dog roxnaeuz sam haj boux naengh youq bakdou siuqseuj guh aendomq, yienjok cungj saedceij andingh vuenyungz ndeu. Aenvih gizneix guh aendomq lai, daih cienz daih, yied guh yied hoengh, geij bi gonq ndaej vunz heuhguh “diuzgai aendomq”. Cam vunzlaux henz gai ndaej rox, seizneix Gai Giucouh miz 500 lai ranz vunz, ranzranz cungj rox guh aendomq, daj lwgnyez caet bet bi daengz naihlaux caet betcib bi baez ndaejhoengq couh guh aendomq, moix bi daengx gai guh ndaej 30 lai fanh aen, gij yiengh aendomq youh guh ndaej ndei, saek baengz ronghlwenq, caiqlij cienzbouh dwg aeu fwngz baez cim baez da siuqseuj, miz aen hung aen iq, lai cungj lai yiengh, vunzraeuz bae youz cungj haengj cawx dauqranz venj roxnaeuz soengq hawj caencik baengzyoux, goenggya、gi swyez danhvei caemh cawx ma dangq huqlaex bae soengq hawj vunz, ndigah gij domq Giucouh mbouj you gai mbouj doek.

Giucouh dieg youq baihnamz yienhsingz Cingsih 8 goengleix gyae de, dwg aen singzgeq bya raemx lumj veh、doenghnaz lumj man、dieg gaeuqgeq ceroengz lai、fungsug fungcingz Bouxcuengh naekgywg、yinzvwnz lizsij gyaenanz ndeu, ndaej vunzraeuz heuhguh “aen bozvuzgvanj cojcienz Bouxcuengh”. Gizneix goengqbya daengjdwt heuswd, raemxdah sawyau laerat, aendiengz aenmiuh, ing bya dep raemx doxingj doxdaengh, doenghnaz homfwt budoh ndaw rungh, gingj gyaeu yinx vunz. Dingq vunzlaux gizneix gangj, caeux youq Nanzsung satbyai, vunz Gyanghsih Cangh Denhcungh riengz Vwnz Denhsiengz dingjhoenx bing Ciuhyenz saw le, couh daiq gyoengq bing 300 lai vunz dingh youq gizneix, caeuq beixnuengx Bouxcuengh dang- dieg guhhong gvaq saedceij, soncienz gij gisuz vwnzva senhcin daj Cunghyenz daiq daeuj haenx. Gizneix caemh dwg aen ranzmbanj Vajsi fuhyinz boux yinghyungz minzcuz mehmbwk dingjhoenx bingraq Yiz- bwnj riuzmingz daengx biengz haenx. Gij gojgaeq gamjdoengh vunz Vajsi fuhyinz gaenx guhhong gaenx hagsib gaenx lienh dwkgienz hoenxciengq haenx, daengz seizneix lij riuzcienz youq ndawbiengz Giucouh.

Byaij gvaq “gaidomq”, ngomx gvaq daizheiq “Bam Yaemcuengh”, gyoengqbya sang’vid geizheih doenghnaz heusaux couh roemx haeuj lwgda daeuj. Byaij youq henz dah haenznaz, yawj gij goengqbya gak cungj gak yiengh ndei yawj haenx, fwngz lumh gomiuz heuswd ndaeng nyouq heiq hom haeuxnaz, caen simsangj simsoeng ha. Gizneix vwnzvuz dieggeq caemh lai, miz aenmoh Cangh Denhcungh Ciuh- mingz laeb haenx, miz benq mohgeq Ginzsi Dujswh, ndaej hawj vunzraeuz gamjsouh daengz bi’ndwen lizsij siliengz yauyau; byaij gvaq diuzgiuz, bin hwnj aen Vwnzcanghgwz henz Dahmboqhanq youq Ciuhmingz Ciuhcingh guhbaenz neix, muengh- yawj giz gyae, yawj doh gingj gyaeu gingj lengj, ndawsim cix angqyangz haenhdanq, goengmbwn cauxdieg akraeuh, beixnuengx Bouxcuengh gizneix simsoh gaenxgyaek vunzlai aeueiq.

Daengngoenz yaek doekbya, gou caemh mbouj sij dwk hai ci biekliz Giucouh, hoeng gij gingj gyaeu gizneix, gij yinzvwnz lizsij gyaenanz gizneix, gij singqcingz simsoh gaenxgyaek beixnuengx Bouxcuengh gizneix, cungj hawj gou louz miz yaenqsiengq laeglwd……