Vihliux nyinhcaen cungjgez gyauhliuz gij gingniemh sonhag Cuengh Gun song saw vah, daezsang Cuengh Gun song saw vah lauxsae sonhag suijbingz, coicaenh hong sawqniemh Cuengh Gun song saw vah sonhag yamqonj guh baenaj, Swcigih Gyauyuzdingh 12 nyied 1~2 hauh youq Sangswh Yen banh le aen beizyinbanh lauxsae Cuengh Gun song saw vah (ranghdieg baihnamz), baenz bak boux Cuengh Gun song saw vah gyauyenzyenz、Cuengh Gun song saw vah siujyoz (baugvat yozcenz- banh) lauxsae guzgan Sawcuengh daj Lungzanh、Dwzbauj、Denzlinz daengj 17 aen yienh (si、gih) ranghdieg baihnamz daeuj haenx angq comz daengz Sangswh Yen camgya beizyin. Swcigih Minzcuz Gyauyuzcu cucangj Veiz Lanzmingz bae sonyinx beizyin caemhcaiq youq gwnz hoih cungjgez guh aen baugau gvendaengz guh ndei hong Cuengh Gun song saw vah sonhag.

Veiz Lanzmingz youq gangjvah seiz raemh naeuz, aeu cungfaen roxyiuj gij yiyi youqgaenj guh Cuengh Gun song saw vah gyauyuz: It dwg leihyungh gij ndeindiq vahcoj haifat gij coengmingz gvaigvet lwgnyez Bouxcuengh; ngeih dwg swnjcienz caeuq cienzyiengz gij vwnzva conzdungj maenhndei Bouxcuengh raeuz; sam dwg gij yaekaeu dangqnaj cungh siujyoz gyauyuz sonhag gaijgwz de; seiq dwg gij yaekaeu lauxsae Sawcuengh ciennieb baenzmaj de. Doeklaeng de gujli gyoengq Cuengh Gun song saw vah lauxsae caeuq gyauyenzyenz aen lailai bae guh ndei Cuengh Gun song saw vah gyauyuz sonhag caeuq gyauyenz yenzgiu, cungfaen yungh ndei gak cungj gyaugaij cwngzgoj、sonhag fuengsik fuengfap, coicaenh Cuengh Gun song saw va sonhag cizlieng caeuq bonj hagdangz sonhag cizlieng ndaej mboujduenh daezsang.

Baez beizyinbanh neix hingzsik moqsemq, neiyungz lai cungj lai yiengh, gawq cujciz daihgya bae yienhciengz yawjngonz eihag dangz goq guhyiengh Cuengh Gun song saw vah sonhag, youh comz daihgya caez guh bingz goq caeuq Cuengh Gun song saw vah sonhag gyauyenz. Gyoengq lauxsae、gyauyenzyenz Cuengh Gun song saw vah bae daengz Gyanghbingz Siujyoz yawjngonz eihag le yozcenz- banh dangz goq gyoepyaem Sawcuengh、siujyoz ngeih nienzgaep dangz goq guhyiengh sonhag ngeih- loih mozsi Cuengh Gun song saw vah le, raen lauxsae sonsaw ndeidingq yinx vunz、hagseng angqyangz boiq- hab、yaugoj sonhag gig ndei, cungj daengj mehfwngz haenh ndei; youq doxcomz bingz goq caeuq faen cuj guh gyauhliuz nem sonhag yenzdauj seiz, daihgya miz maz gangj maz, danhfanz siengj daengz naemj daengz doiq hong Cuengh Gun song saw vah sonhag miz ndeicawq haenx cungj gangj doh, doxgyau gingniemh sonhag caeuq guh yenzdauj, gangjgangj gij ndaejdaengz camgya baez beizyin neix, daihgya cungj souhaeuj lairaeuh.