Hawj lwgnyez daenj geijlai geu buhvaq, itbuen dwg gaengawq aenmbwn bienqvaq daeuj dem gemj, itbuen vunzhung daenj geijlai geu lwgnyez couh daenj geijlai geu, danghnaeuz vunzhung mwh mbouj doengh seiz mbouj roxnyinh nit, hix mbouj roxnyinh ndat, couh gangjmingz habngamj lo, lwgnyez hix dwg yienghneix. Mbangj lwgnyez ndang mbouj daiq ndei, lumj baenz binghndokunq、ndang noix diet lwedhaw roxnaeuz bingzseiz haengj baenz dwgliengz haenx, wng beij vunzhung lai daenj geu buhvaq ndeu. Danhseih aeu haeujsim diemj ndeu dwg, lwgnyez haengj doengh、haengj guh youzheiq diuq hwnj diuq roengz seiz, aeu gaengawq cingzgvang dem gemj buhvaq, mienxndaej ok hanh daiq lai yinxhwnj baenz dwgliengz.