Diegcoj dwg diuz mae raezrad, seiqseiz yiendoengh aensim bouxyouz; diegcoj dwg aen ronghndwen goz, youq ndaw moengzloengz ngaeu hwnj youcaeuz siengj diegcoj; diegcoj dwg fuk veh daihsae veh, ce yied nanz yied dijbauj. Liz diegcoj yaek ndaej 30 bi lo, dauqbae diegcoj baez ndeu couh siuj baez, hoeng, ndawsim gamjcingz doiq diegcoj cix yied daeuj yied noengz.

Diegcoj dwg aen cin liz yienh- singz 20 goengleix gyae ndeu, vunz gizneix baenzciuh ndaem naz caeuq guh seng’eiq. Gou seiziq gvaq ndaej gig gannanz, hoeng, youq ndaw ndwenngoenz mbouj miz ngaenz cix cungj mbouj siuj angq. Moix ngoenz cuengq daehsaw roengz, couh riengz gyoengq doengzdoih ndonj haeuj benq go’ngox bae, gaeb bya、gaeb baeu、mbon rongzroeg, roxnaeuz “bumbam bumbam” diuq roengz ndaw dah bae dajcaemx. Daengz sujgyaj, doxgaiq ndaej guhcaemz couh engq lai lo, benz hwnj gofaex bae gaeb duzbid, roengz ndaw naz bae gaeb byanouq、ep goepgvej, boenz naez hix boenz ok haujlai banjdaeuz.

Diegcoj youq diegbingz Suhbwz, hoeng, hix suenq ndaej aendieg miz bya youh miz haeux, fwnraemx lai, gingjsaek gyaeundei. Gou lij iq seiz, hawj gou byongj ceiq gyae couhdwg fwn diegcoj youq ndaw loq, gingjsaek diegcoj youq ndaw fwn. Moix daengz seiz doekfwn, swnghcanjdui couh rox ciucomz bouxlaux daenj luiq、gaem hongdawz, byaij daengz ndaw nazreih bae guhhong. Boh gou dwg duicangj, meh gou dwg lauzdung guzgan, seizneix couh cij miz beixnuengx dou youq ranz lo. Gij ndwenngoenz haenx, mbouj doeng dienh, mbouj miz densi caeuq youzhigih, dou couh buen aen daengqiq, naengh youq baihnaj bakdou dinghdingh dwk yawj doekfwn. Naedfwn deihyaenyaen dwk roq dingjranz, lumjnaeuz faexroq iq youq gwnz gyong diuqfoux; fwnraemx riengz yiemhranz gig bieng dwk doek roengzdaeuj, baiz yiemhranz couh venj hwnj coij yiemzfwn he, youh lumj fan raemxgienghdat iq; fwnraemx caenh- cingz dwk cauzndwet, luengq iq, yaepyet couh doxgap baenz diuz dah he. Cin iq youq ndaw fwn caeuq hoenz, biu bae biu dauq、moengz- loengz、moqsemq.

Diegcoj youq ndaw rumzfwn byaij gvaq bi doek bi, bouxvunz youq ndaw diegcoj swnghhoz, mboujguenj saeh- cingz gwnzbiengz baenzlawz bienqvaq, swnghhoz gauhneix fouqmiz, itcig baujciz bonjsingq giemhaw、sohswd、hamzhawz, mbouj miz saek di feihhoenzfeiz seiqsug.

Gou riengz riz loq, cimhra roen dauqbae diegcoj, dah iq、diegnamh caeuq ranzgaeuq siusaet youq ndaw seizgan, geijlai mbat youq ndaw loq gou okyienh. Loq dauqma diegcoj seiz, miz feih hom namh daiq nywjheu, lumj seiziq byaij youq gwnz haenznaz nei, feihdauh maeuq roengzdaeuj depgyawj nyouq ndaej, daiq miz heiqdumz, cigciep biu haeuj ndaw ranz haetromh. Diegnamh henj biu miz baenz raq baenz raq namh hom, ciengxlwenx gikcingz siengjgyaez gou, dwg rag diuzmingh gou, dwg dieg yietnaiq hoenzvunz.