Gaenh geij bi neix daeuj, Nazboh Yen yungh lai cungj banhfap, gyagiengz hong swnjcienz caeuq baujhoh feihvuzciz vwnzva yizcanj, haenqrengz dajcaux Bouxcuengh vwnzva binjbaiz.

It dwg gyagiengz lingjdauj, dungjyiz gveihva. Yen cwngfuj aeu hong swnjcienz caeuq baujhoh feihyiz liedhaeuj daengx bi guhhong dajsuenq, baujcwng feihyiz swnjcienz cingqciengz guh. Binaengz youq banh Bouxcuengh sam nyied sam ciet baebo、 Lungzhoz Bouxcuengh ciet bauqva gaxgonq, bangcoengh guh ndei gak hangh hong bwh, baujcwng ngoenzciet swnhleih guh baenz, hawj ngoenzciet vwnzva yaek siusaet haenx ndaej swnjcienz caeuq baujhoh.

Ngeih dwg yen caizcwng bued roengz cienz cienhangh, cujciz aen yienh neix bouxguhhong vwnzyi caeuq cingj lauxhangz biensaw、 cingjleix、 sijfwen, gaenq sij ok fwen maenhndei Bouxcuengh 30 lai hot, hawj Bouxcuengh vwnzva ndaej riuzcienz.

Sam dwg haibanh gvangjbo densi Vahcuengh lanzmoeg. Youq yen gvangjbo densidaiz hai 《Gojgaeq Vahcuengh》、《Gyaez Mbanjcuengh》、《Doiq Fwen》daengj lanzmoeg, yungh Vahcuengh doengsug ngaih rox gaisau ndawbiengz ngoenzciet fungsug, baijyienj dinfwngz swnjcienz vwnzva, swnjcienz hwngfat Bouxcuengh vwnzva maenhndei.

Seiq dwg fwen haeuj hagdangz hozdung, gungganq vunzcaiz swnj- cienz Fwencuengh. Cingj fwenvuengz canghfwen Bouxcuengh haeuj hag- dangz, yungh gag eu fwen、 doiq fwen、 hab eu hingzsik guh beizyin, gungganq vunzcaiz swnjcienz Fwencuengh.

Haj dwg bien ok dauqsaw Nazboh minzcuz vwnzva. Cingj 10 lai boux ndawbiengz fwenvuengz、 canghfwen、 bouxciengqgo daengj bouxguhhong vwnzva laebbaenz biensijcuj, daj- suenq oksaw 《Fwen Bouxcuengh Nazboh》、《Go Rwenz Nazboh》、《Nazboh Feihyiz Dozdiemj》 daengj cozbinj. (Liengz Beizcuh/梁培珠)