Sanglinz Yen Dangzhungz Cunghsinhyau dieg youq Sanglinz Yen baih saebaek, bi 1926 laebbanh, fuzvu gvaengh Dangzhungz Yangh 10 aen mbanj caeuq song aen segih, daih’iek miz 5 fanh gyaeujvunz, baihlaj guenj miz 7 aen siujyoz 10 aen gyauyozdenj.

Bi 1984 ndwen 9, aen yangh neix Sizmwnz Siujyoz haiguh Cuengh Gun song saw vah saedniemh sonhag, bi 2012 youh gietdingh youq daengx yangh sojmiz siujyoz haiguh Cuengh Gun song saw vah sonhag le, Swcigih Gyauyuzdingh youq gyauyenz gingh- fei、gaijndei hagdangz sezsih fuengmienh daihlig cihciz. Bi 2013, Gyauyuzdingh hawj daengx yangh siujyoz haibanh Cuengh Gun song saw vah sonhag haenx moix boux lauxsae aen dennauj fwngzriuj ndeu, bi 2015 ndwen 5, youh hawj hagdangz sojmiz cunhgaep siujyoz boiq hawj hagdangz gvangjbo hidungj, cunghsinhyau guhbaenz le aen gyausiz dohmeizdij sifan gvanh- mohgoq he, hagdangz gak cungj sezsih caeuq vanzging ndaej gaijndei haujlai. Dangqnaj, daengx aen cunghsinhyau miz it nienzgaep daengz roek nienzgaep 88 aen ban, 2115 boux hagseng, 142 boux lauxsae.

Aen cunghsinhyau neix ciuqei cibroek cih sonhag fuengcim“Aeu Cuengh Guhcawj、Cuengh Gun Giethab、Aeu Cuengh Coi Gun、Cuengh Gun Cungj Rox” neix, haenq ca Cuengh Gun song saw vah sonhag, dawz minzcuz vwnzva gyauyuz caeuq gwnzdangz sonhag gaenjmaed giethab hwnjdaeuj, hawj gyoengq hagseng youq ndaw hagsib minzcuz vwnzva bae ciepsouh maenhndei minzcuz vwnzva roemzoenq, daj neix daeuj demgiengz hagseng minzcuz saenq- sim, mbangj hagseng youq swcigih、yienhgaep gak loih doxdax cungj aeundaej cingzcik maenhndei.

Cunghsinhyau genhciz “doxgap、mbaqrap、cauxmoq” aen banhhag fuengyiengq neix, daihlig doicaenh Cuengh Gun song saw vah sonhag, cingzcik yienhda. Baenz le swcigih seiq aen “caepguh Cuengh Gun song saw vah gyauyuz sifan gihdi” ndawde aen ndeu; Sizmwnz Siujyoz youq bi 1993 ndaej daengx gih “Sawcuengh Haeuj Hagdangz Saed- niemh Senhcin Cizdij” cwnghauh, bi 1998 caeuq bi 2000 faenbied aeundaej Namzningz Digih Hingzsuj soengq hawj “Sawcuengh Haeuj Hagdangz Saedniemh Senhcin Cizdij” cwnghauh; daengx yangh miz 5 boux lauxsae ndaej senj haeuj Gvangjsih Bak Boux Cuengh Gun Song Saw Vah Mingzswh Beizyangj Gunghcwngz beizyangj doiqsiengq; bi 2014 Gvangjsih Minzcuz Bau daengj sinhvwnz meizdij baudauj hong song saw vah sonhag miz 12 bien; hagdangz gonqlaeng deng bingz guh Sigaep Cungh Siujyozyau Cangzgveih Guenjleix Hagdangz、Yienhgaep Vwnzmingz Hagdangz、Yienhgaep Gyaez Guek Veiswngh Senhcin Danhvei、Yienhgaep “Bujgiz Cuhdwngj Gyauyuz” Dazbyauh Hagdangz; hagdangz dangjcihbu deng bingz guh Yienhgaep Senhcin Dangjcihbu, hagdangz sausenhdui deng bingz guh Yienhgaep Hungzgiz Dadui; hagseng camgya gak gaep gak loih doxdax cungj aeundaej cingzcik ndei……