Ngonzyawj gij vihbaijok geij aen disi haenx caez le, de doiq Anh Bingzswngh、Cinz Yinggih naeuz, vasaek binjcungj raeuz lij mbouj gaeuq lai, bimoq yaek guh aen giva, demgya vasaek caeuq binjcungj. Guj daengz bimoq roxnaeuz bilaeng, gangcaiz raeuz ndaej gihbwnj gvaqgvan, caj gij aen gihcaenxdaenz ndaej yungh le, gij laemzgienh gangcaiz guh doxgaiq ngoenzyungh aeu yungh haenx, lumjnaeuz diuzsej liengjbaengz daengj cungj gihbwnj gaijgez ndaej. Cinz Yinggih naeuz, seizneix dietbakmax lij gig noix, mbouj gaeuq yungh. Anh Bingzswngh nyinhnaeuz, gij huqok camhseiz lij mbouj ndaej gunghawj yienzliuh haenx, seizneix goj aeu bwh ndei, dub ndei goekdaej hawj daengzcog guh hong cauh’ok. Veiz Gozcingh naeuz, gijneix gig miz bizyau, caep ndei goekdaej gonq, liuxle caj raeuz miz caizliuh le couh ndaej guh hwnjbae lo.

Ndaw duenh de ngonzyawj haenx, de fanfoek naeuz Yin Gwnghgingh caeuq Vangz Yungz, gij doxgaiq raeuz cauh okdaeuj haenx, cizlieng aiq miz didi yaez, hoeng aeu gyaezhoh de, dingjrengz de, gij bumwnz honggaicawx aeu soucawx, bouj di ngaenz hawj de goj ndaej ha! Gunghyez Honggaicawx aeu dox- dingjrengz, louz haemzhoj hawj bonjfaenh, soengq fuengbienh hawj vunz wnq, doengzcaez guh hong doxgaiq ngoenzyungh hwnjbae. Ginghgungh、hongdinfwngz aeu guh di cingzbauq gohgi, gaej cungj gag gven dou. Guh ngeixyaeng gohyoz, gunghsangh aeu doxgap hwnjdaeuj, couhdwg ok geij boux vunz, hawj di sezbei, bizyau ne cix cingj di canghhag diegrog daeuj. Rog gih miz gijmaz huq ndei, cix cawx di dauqma ngeixyaeng, gij huq moq rogguek, goj ndaej cawx di dauqma camgauj. Guh gijmaz cungj aeu haenqsim, saehcingz fanzdwg dingh roengzdaeuj le, couh itdingh aeu guh ndei bae.

Ngonzyawj sat le, de daegbied daengq Cinz Gaihlu naeuz: Lwnh gij bumwnz mizgven giva、ginghgungh、honggaicawx gak disi haenx nyi, yawj gvaq baijok aeu guh ngeixyaeng, baenzlawz fatdoengh vunzhong bae hagsib, it fuengmienh ra ok doxca, lingh fuengmienh dwg dajheiq, gaej cungj bihbingz “bya hoj raemx yaez”, cungj naeuz doeklaeng, loengh hawj vunz doeknaiq, aeu doenggvaq doxbeij, ra gij giz mbouj ndei okdaeuj, cagaenj coemj hwnjbae. Vunz wnq miz song gaiq fwngz, raeuz hix miz song gaiq fwngz, vunz wnq guh ndaej hwnjbae, raeuz vihmaz guh mbouj hwnjbae? Daihgya daeuj le aeu dajheiq, bingzbeij aeu goeng- bingz, vunz wnq gyawz ndei, raeuz gyawz yaez, ndei cix ndei, yaez cix yaez, yienghneix cij hawj vunz saenqfug. Huqok ginggvaq giemq- dingh ndaej habgek le, aeu ndeindei senhconz. Seizneix guh senhconz, cungj dwg gij vunzrog ndei, gij bonjfaenh yaez, yienghneix guh biensim lo. Raeuz aeu ciuq saehsaed senhconz gij daegdiemj huqok deihfueng.

(caengz sat)