冬雨

Daengz seizdoeng lo, gou gaenq daenj buhmienz lo, ngoenzneix sawqmwh doek fwn, fwn gig raeuj nyinh, doekbyoegbyoeg, rim mbwn mbinyagyag, lwgnyez ngoenzneix mbouj hwnjdangz, youq ranz naengh mbouj ndaej, yienghneix couh gang liengj daiq de bae diegdangz guhcaemz. Daeglwg gou din daemh raemx comz gwnz dieg suijniz, geuvaq dumzrad, hoeng, de gamjdaengz din daemh raemx gig simhai, hixnaengz couh mbouj leix de lo.

Baih doengnamz diegdangz seizcin miz byaekcaez sengmaj, bineix mbwn nit laeng di, byaekcaez lij heuswd, caeuq daeglwg gou bae yawj, lij caen heusausau, gig dwggyaez, siengj daengz vat byaekcaez ma gwn seizde, mbwn lij raeujrub, rumz baet mbaeumbieng, youq gwnz diegdangz canj aeu go byaekcaez hung, dawz dauq ranz dinq ndei, dwk raemxgoenj log, byaekcaez engq heuloeg, feih byaekheu noengznwd biu haeuj ndaeng daeuj, haenx dwg gij feihdauh ndaw doenghnaz, itheij ciemq haeuj ndaw swnghhoz gou, doeklaeng guh baenz gyaujswj, miz lingh cungj fungmeih, gou gamjdaengz swhgeij caeuq daihswhyenz depgaenh di lo, hix ndaej le faenh langhmanh bingzciengz swnghhoz ndeu.

Doek gvaq raq fwn ndeu, ngoenzcog byaekcaez engq heurau, neix dwg seizdoeng ndiep raeuz cij soengqhawj. Fwn doek hung lo, caeuq daeglwg buet dauqma ranz ndoj fwn. Daeglwg gou mbouj nyienh dauq, aenvih de dwg boux lwgnyez he youq baihrog guhcaemz baenzngoenz cungj mbouj siengj dauqma ranz.

Fwn baenzneix soebsoeb doek roengzdaeuj, gou hainduj menhmenh siengj daengz gyoengq baengzyoux, gij saeh gaeuq, gij saeh gaeuq ndaw fwn, ndawsim hix ciemhciemh dumzmbaeq lo……

Seizneix gou mbouj caiq lau doek fwn, dauqfanj miz di maij de, raen de bingzciengz lai lo, dauqfanj maij doek fwn lo.

Fwn nit rogcueng roq doucueng, gou cix siengjniemh lingh boux vunz, boux de yaengyaeng gop raemxfwn hwnjdaeuj, bienq ok lingh aen mbwn ndeu daeuj.