Geij ngoenz gonq, loengleq yawj mbaw siengq he, boux daxheiz ndang biz he soengz youq laj raemh bakdou dayoz, ndit ciuq youq gwnz doengjmbaq, baihnaj de dwg bouxlan ndeu naengh youq ndaw cilwgnyez, ndaw fwngz de gaem gaenzci cilwgnyez, riuhaha dwk yawj coh gingqdaeuz, vuenyungz daj byai bwnda gakda de fat okdaeuj. Lingh mbaw siengq, dwg daeg mbauqcoz gaenq majhung he launyaenq fubfub dwk riu, baihlaeng vanzlij dwg aen bakdou dayoz, faexmak ciuqyiengh heuswdswd, hoeng, baihnaj de gaenq dwg meh laux geq lo. Ndwenngoenz youq gwnz ndang de louz roengz aen yaenq he gig laeg, vanzlij yawj ndaej ok aen yienghsiengq gaxgonq, hoeng miz di mboujcaengz bienq, couh dwg faenh najriu caeuq vuenyungz de.

Cuj mbawsiengq neix sengdoengh youh raeujrub, gaenq gamjdoengh haujlai vangjyouj. Ndawhoengq doxdoengz, yienghceij doxlumj, doengz boux vunz ndeu, yaepyet couh yat gvaq cibgeij bi lo. Cij dwg yaep he, de couh gig miz rengz dwk gig haeuj ndaw simdaeuz gou, hawj gou geiq ndaej laegmbub.

Seizgan gipgip muengzmuengz gvaqbae geijcib bi, bohmeh dauqdaej bienq laux lo, byoemgyaeuj gaenq hau bae. Gyoengqde daengxciuh bingzonj, mboujcaengz guh ok maz saehhung, ndawsim ceiq daih maqmuengh, dwg maqmuengh dou bingzan. Lwgnyez majhung, mbin ok rog bae, gyoengqde nienz laux, couh ancingh dwk youq ndaw ranzcoj, ngoenz gvaq ngoenz, dauqcungz guh saeh saepsoiq, caemrwd mbouj rox baenzlawz gangj okdaeuj, cijndei buenx gij ndaejgeiq aeuraeuj.

“Laux lo……laux lo……” Goenglaux caeuq yahlaux ciengzseiz yienghneix danqheiq, youq ndaw sing danqheiq, dwg fouznaih caeuq doekhoengq, dwg cuengq mbouj roengz siengjniemh. Daengngoenz yaek doek roengz bya bae, song boux de doxing doxfuz, saemxsaemx saxsax dwk menh byaij menh bae gyae, doeklaeng gyoengqde cungj rox byaij daengz seizgan doekcod, yienghneix raeuz couh buenx gyoengqde menhmenh bienq laux ba……