Aenmbanj ing bya dep raemx, raemxrij laj giuzrin iq laeretret, nazreih gaiq lienz gaiq doxdaeb bin sang, fanlaep humx suen, bit gaeq swenjyetyet, gyoebbaenz fuk veh byaraemx mbanjbya gyaeundei ndeu; ndaw mbanj roen luengq seuqcingh, ranzlaeuz moqsaksak, vwnzva gvangjcangz gvangqyub, daizheiq daengjdwt gig miz daegsaek minzcuz, najranz laengranz gomak gofaex heuswd raemhrwd……Gijneix dwg bouxsij youq ndaw Mbanjngozvai yawjraen haenx.

Denzlinz Yen Lucwngz Yauzcuz Yangh Vanggiz Cunh Mbanjngozvai liz yienhsingz Denzlinz 20 goengleix gyae, miz Cuengh、Gun、Yauz daengj lai aen minzcuz comzyouq, fungcingz minzcuz naekna. 2009 nienz 5 nyied, aen mbanj neix ndaej laebguh “mbanjmingzsingh gohyoz hwngfat” sifandenj le, doenggvaq haenqrengz guh geij bi, ndaw mbanj guhbaenz aen vwnzva gvangjcangz 3000 bingz- fanghmij gvangq caeuq aen daizheiq 170 bingzfanghmij gvangq ndeu, roengzngaenz 78 fanh maenz guh- baenz aen laeuzcunghab miz 734 bingzfanghmij ndeu, ndawde laeb miz funghranz cunhveij、ranzsaw vwnzva caeuq diemjsonhag lizgyae daengj, lij laeb miz cunhgaep veiswnghsiz dem. Guh ndei “mbanjmbanj doeng”、lizgyae gyauyuz gensez, gvanhdai vangjloz haeuj mbanj, saedyienh le vangjloz densi daengx mbanj hoemq- cw, densi haeujranzlwd dabdaengz 100%. Doengzseiz, guh ndei vanz- ging seiqhenz mbanj、vanzging ndaw mbanj caeuq vanzging ndaw ranz gensez, daengx mbanj ranzranz cungj ndaej doeng swlaizsuij, roensuijniz cix doeng daengz bakdou gak ranz, 95% doxhwnj nungzhoh senj haeuj ranzlaeuz moq youq. Yiengh mbanj bienq moqsak, saedceij vunzmbanj bienq fouqmiz, fuengsik gvaq saedceij caemh bienq ndaej engq vwnzmingz.

Mbanjngozvai haenqrengz guh ndei hong dajndaem dajciengx, aeu aen mozsi dajndaem moq “gunghswh + gihdi + nungzhoh” neix, saedhengz raet—lwgmanh、haeuxnaz—lwgmanh doxlwnz dajndaem mozsi, demlai dajndaem souhaeuj, doengzseiz lai guh dajciengx caeuq dajndaem doenghgo daegsaek, hong laj faex dajndaem dajciengx guh ndaej hoenghhwd, ginghci yauyiz yienhda. Seizneix, ndaw mbanj lienzbenq dajndaem 3000 moux youzcaz gauh- canj、300 moux makmaenj、100 moux lwgmanh; miz ciengzciengx- gaeq laj faex 3 aen, bi gai gaeqnoh 30000 duz doxhwnj; daengx mbanj faexndaemgai menciz dabdaengz 3500 lai moux, lij ndaem miz byaekgve 67 moux dem.

Mbanjngozvai youq ca ndei vuzciz vwnzmingz gensez doengzseiz, lij guh ndei cingsaenz vwnzmingz gensez, gaenxgoemx guh gij vwnz dij hozdung lai cungj lai yiengh haenx, laebbaenz le cunhgaep lanzgiuzdui、doihfouxsaeceij、Duenzheiqcuengh Ngozvai doengh gijneix, gvaq ciet gvaq cieng, hozdung hoenghhwd; laebdaeb guh ndei gij sezsih hozdung cunhgaep, mboujduenh gyalai gij saw ndaw ranzsaw, mbouj dinghgeiz banh aenhoih doxgyau doeg saw, soncienz gohyoz、vwnzva、faplwd caeuq veiswngh doenghgij cihsiz neix, hawj vunzmbanj angqyangz vuenyungz gvaq saedceij ndei.