Lwgmak yingzyangj gyaciz ndei, bouxvunz couh suenq mbouj miz bingh gwn de doiq gengangh hix miz ik. Cijdwg lwgmak yienznaeuz caiq ndei, gwn ndaej ngamjhab cij ndei. Lajneix gaisau gwn geij cungj lwgmak miz maz ndeicawq:

Makcauj nding: Ndaej ik lwed cangq saenz, ciengzseiz gwn de ndaej bouj lwed, doiq bouxsai hengz fuengzsaeh caeux biu caeuq yangzveij miz haemq ndei ceihyw cozyung.

Makit: Aeu 250 gwz makit singjsien ma, bok naeng cawz ngveih, nap aeu raemx de gya habliengh raemxraeuj gwn, ngoenz baez daengz song baez, lienz gwn song aen singhgiz, ndaej yw cenzlezsenyenz caeuq ok nyouh dinj nding sep.

Makgai: Aeu 10 gwz ngveih makgai, dub myaz le baek raemx gwn, ngoenz 2 baez, lienz gwn song aen singhgiz, ndaej yw gyaeqraem in caeuq gyaeqraem gawh in.

Moeggva: Aeu 250 gwz moeg- gva, cab baenz gaiq le dwk roengz 2 gaen laeujhaeux bae cimq song aen singhgiz gwn, moix baez gwn 15 hauzswngh, ngoenz gwn 2 baez, lienz gwn song aen singhgiz, ndaej yw mak haw viz mbouj ndongj caeuq caeux biu.

Makhwzdauz: Ngoenz gwn 2 daengz 4 aen, ndaej cangq mak bouj lwed, lij ndaej bangbouj yw mak gietsig caeuq sainyouh gietsig, caemh ndaej doiceiz nyieglaux.

Maklaehcei: Aeu 15 daengz 20 aen maklaehcei, dub soiq le gya raemx baek gwn, ndaej yw gyaeqraem gawh in.

Cehmbu: Aeu cehmbu singjsien 15 gwz(cungqgyang cehmbu di ngaz- loeg de gaej mbek bae), baek raemx lienz cehmbu itheij gwn roengzbae, ndaej yw fangzhwnz loq laeuhcing. Hix ndaej aeu cehmbu singjsien 10 gwz (daiq simngaz) cuengq gwnz haeux naengj cug nyaij gwn, ngoenz gwn 2 baez, lienz gwn 2 ngoenz.