Mbwn ciemhciemh laep lo, mbouj miz maz saeh guh gig mbwq couh roengz laj laeuz daeuj daengz diegdangz. Ngamq byaij hwnj diuz roenbuet nding, bang mbauqcoz ndeu couh buet gvaq baihnaj gou bae! Gou raen gyoengqde mbouj miz geijlai cabied, cungj dwg boux riengz boux, hawj vunz nyaenx mbouj ndaej hemq: “Hamj gvaqbae ba！” Yienghneix, gou couh dingz din ngonz, ciemhciemh, mizmbangj hagseng sai dingj mbouj ndaej lo, song fwngz got dungx, naet dwk heiq baegfofo, hoeng, lij youq gizhaenx genhciz buet, caj rengz bouj hwnj le, couh laebdaeb buet bae coh baihnaj, gaenriengz vunzlai, daengz doeksat lij mbouj haengj vutvak. Yawj gij mbauqcoz cungmuenx vuedlig neix, gou gag haenhdanq: “Ndei lai lo!”

Siengj daengz gyoengqde hax- baenz doxdax buet gig haenq, ndawsim gou gag siengj: Ciengz doxdax neix nanzdauh mbouj lumj doxdax hagsib ha? Hainduj, mwngz caeuq gou mbouj miz geijlai cabied, buenx dwk hagsib menhmenh haeujlaeg, aenvih moix boux vunz hagsib cangdai mbouj doxdoengz, couh cugciemh liz gyae lo.

Bouxwnq bae doekgonq, hoeng, swhgeij cix lot daengz baihlaeng bae, danghnaeuz swhgeij caiq mbouj gibseiz diuzcingj, yienghneix, couh biujmingz swhgeij gagnyienh lotlaeng, hix couh lumj buet baeg lo, gag deuz okdaeuj, naengh youq gizhaenx laep da yietbaeg, mbouj caiq yunghrengz, cij guenj vaiqvued, yienghneix couh gouq mbouj ndaej mwngz lo; danghnaeuz dingz yaep he, caj rengzndang hoizdauq caiq buet, hoeng, yienghneix cij gojnwngz buet ndaej baenzgoeng, aenvih gaxgonq lotlaeng le caiq siengj gyaep hwnjbae couh gig nanz lo; danghnaeuz rengzndang gaenq sied bae lai seiz, menh buet menh bouj rengz, lauheiq mwngz liz baenzgoeng couh mbouj gyae lo, caemhcaiq baenzgoeng itdingh dwg mwngz.

Yienznaeuz naengzlig swhgeij mbouj dwg ceiq ndei, hoeng, ndaej doenggvaq yunghrengz bae bouj dauq, caeuq doiqfueng sukiq cengca, nanz le, cijaeu genhciz, yungh raemxhanh swhgeij bae buek cungj itdingh miz soundaej.

O! Youh dwg bang mbauqcoz ndeu buet daeuj lo, gou gaenriengz hwnjbae, menhmenh, naet lo, hoeng, gou lij haebheuj genhciz, buet sat mbat daih’it buetgyae. Seizneix, hanh lae hanh roenx, soengswtswt, aenvih lae raemxhanh, mboujdan soundaej gij angq baenzgoeng, lij miz aensim yunghrengz genhciz、ciengxlwenx mbouj seizbienh vutvak ndeu dem!