Lungzanh Yen miz 5 aen hagdangz sawqdiemj son Sawcuengh, Gyauzgen Cin Luswz Siujyoz dwg ndawde aen he, hagdangz ciemq deih 1.6 fanh bingzfuengmij, seizneix miz youwzbanh、yozyenzbanh caeuq it daengz haj nienzgaep gungh 7 aen ban, miz hagseng 233 vunz. Hagdangz miz 9 boux lauxsae, miz 2 boux dwg conhyez Sawcuengh bizyez. Gaenh geij bi gvaqdaeuj, hagdangz ndaej baihgwnz gak gaep bumwnz gvensim caeuq cihciz, gyauyoz sezsih ndaej gaijndei, gveihcangh cidu ndaej caezcienz, suijbingz song saw vah sonhag ndaej daezsang, cingzcik sonhag lwenqda.

Luswz Siujyoz gig yawjnaek gij hong Sawcuengh Sawgun song saw vah songhag, hagdangz ciuq gij iugouz baihgwnz gyauyuz bumwnz, youq yozcenzbanh couh son hagseng sing yinh diuh Sawcuengh. Lauxsae cimdoiq gij daegdiemj lwgnyez, yungh sam cungj vah——Vahbonjdieg、Vahcuengh byauhcunj、Vahgun bae son lwgnyez, sawj hagseng gig vaiq couh rox doeg、rox sij、rox gyoep Sawcuengh lo.

Youq duenh yivu gyauyuz, Luswz Siujyoz cizgiz damqra diuz- roen ndei song saw vah sonhag. Aenvih hagseng youq yozcenzbanh couh hag le sing yinh diuh, hag rox baenzlawz gyoep Sawcuengh lo, ndigah daj it nienzgaep hainduj, lauxsae couh son gyoengqde gyoepdoeg gij cih ndaw govwnz, sawj gyoengqde roxyiuj eiqsei doenghgij cih haenx, doengzseiz haeujsim baenzlawz doeg gij cih neix, cugciemh roxyiuj gij eiqsei daengx coenzvah, caiq giethab gij eiqsei Vahgun, sijsaeq roxyiuj gij neiyungz daengx bien govwnz. Daengz ngeih nienzgaep le, cingqsik yungh Vahcuengh Vahgun sonhag. Seizneix lauxsae cujyau hawj hagseng rox yawj、rox doeg、roxyiuj govwnz, caemhcaiq youq ndaw faenzcieng ra vwndiz, gaendwk dwg doeg cihmoq、swzmoq, hag rox cujswz caeuq cauxgawq. Hagseng sam nienzgaep doxhwnj cujyau hag sij cozvwnz, hag doeg Sawcuengh gangj Vahcuengh, hag rox baenzlawz yungh Sawcuengh fanhoiz Sawgun. Vahcuengh Vahgun song cungj saw vah doengzcaez sonhag, sawj cingzcik hagseng ndaej daezsang gig vaiq, 2013 nienz Luswz Siujyoz miz 13 boux doengzhag ndaej bingzguh Lungzanh Yen caeuq Nanzningz Si “sam ndei hagseng”, 2015 nienz youh miz 7 boux doengzhag ndaej bingzguh yienh、si “sam ndei hagseng”, 2015 nienz haggeiz cawzcin cwzsi, daengx hagdangz miz 22 boux hagseng yijvwnz、suyoz cungj gauj ndaej 90 faen doxhwnj.

Hagseng cingzcik ndei dwg baengh lauxsae son ndaej ndei. Haujlai bi gvaqdaeuj, gyoengq lauxsae song saw vah Luswz Siujyoz youq gyadaih ligdoh guh song saw vah sonhag le, simhaw hagsib gij gingniemh yozyau wnq sonhag song saw vah guh ndaej ndei haenx,mboujduenh gaijndei fuengfap sonhag, doengzseiz cizgiz camgya gak cungj song saw vah sonhag doxdax ndaw yienh, baengh neix bae daezsang gij suijbingz sonhag swhgeij. 2012 nienz 10 nyied, Lungzanh Yen youq Luswz Siujyoz guh song saw vah godangz sonhag doxdax, lauxsae song saw vah Luswz Siujyoz Luz Fungh aeundaej ngeih daengjciengj, Luz Siufangh aeundaej sam daengjciengj. Ndaw hagdangz gij lauxsae wnq hix ndaej ciengj lai raixcaix: 2014 nienz 6 nyied, Lungzanh Yen gawjbanh Cuengh Gun song saw vah gangjgoq doxdax, yaucangj Luz Cinghvaz aeundaej youhsiu cijdaujciengj, Veiz Ginhyen caeuq Luz Yezli lauxsae aeundaej ngeih daengj- ciengj; 2014 nienz 12 nyied gyoengqde youh faenbied aeundaej Lungzanh Yen Cuengh Gun song saw vah gyauanq doxdax ngeih daengjciengj、sam daengjciengj caeuq it daengjciengj. 1993 nienz 12 nyied Luz Yezli lauxsae lij bingz ndaej daengx gih Sawcuengh haeuj hagdangz sizyen gunghcoz senhcin goyinz dem.