10 nyied ndawnyieb daeuj, Lungzlinz Gak Cuz Swciyen leihyungh Cuengh、 Myauz daengj vah saujsu minzcuz youq Bouxcuengh caeuq Myauzcuz comzyouq yangh(cin) guh faplwd bangcoengh senhconz hozdung, aeu 《Fapguek》、《Fap Vunhyinh》、《Fap Diegnamh》、《Fap Baujhoh Lwgnyez》 caeuq denjhingz anqlaeh daengj yungh Vahcuengh caeuq Vahmyauz loegyaem guh baenz yinhbinz, youq dangdieg ngoenzhaw seiz yungh gyaqci senhconz okcunz boqok.

Seizneix, gaenq youq Sahliz、 Bingzbanh、 Cejlang daengj Boux- cuengh yangh(cin) boqok. Doengzseiz, lij laebbaenz faplwd bangcoengh daizcamcaz, fatcuengq swhliu bujfaz、 daezhawj cam faplwd daengj yiengq baedauq vunzlai senhconz gvendaengz faplwd fapgvi cihsiz. Gvaqlaeng yaek youq Dwzngoz、 Ciengzmou、 Ciengz- ngwz daengj Myauzcuz yangh(cin) yungh Vahmyauz okcunz boqok.

Leihyungh vah saujsu minzcuz doengsug ngaih rox guh faplwd bangcoengh senhconz hozdung, ndaej daengz beixnuengx saujsu minzcuz haengjgyaez, caux ok le Lungzlinz bingzanh、hwnjguh Lungzlinz fazci heiqfaenh ndawbiengz ndei.

(Dauz Dwzgvangh/陶德光)