Swcigih Gyauyuzdingh 10 nyied 22 daengz 23 hauh youq Gveigangj Si guh aen hozdung yawjngonz caeuq baijyienj gij cingzcik maenhndei hong cauxlaeb “Swcigih vwnzva minzcuz son’gyauq yiengh ndei hagdangz” neix, comz gyoengq lauxhangz caeuq bouxdaeuz hagdangz bae yawjngonz hagsib, doxlwnh doxyaeng, romcomz gingniemh, doengzcaez doidoengh gih raeuz hong laebguh hagdangz daegsaek minzcuz guh ndei guh swnh baenaj.

22 hauh banhaet, gyoengq bouxdaeuz Swcigih Gyauyuzdingh Minzgyaucu、hagdangz guhyiengh cauxlaeb gak yienhsi nem doenghboux lauxhangz mizgven doxcaeh bae daengz Cinzdangz Gih Mungzgungh Yangh Gujsanh Siujyoz, nyinhcaen sijsaeq dwk yawjngonz le gij saedguh gihdi、funghranz Ywcuengh、funghranz baijcuengq caeuq ciengzbauq cawjdaez aen hagdangz neix, humxyawj gij biujyienj hozdung dagogenh daengxgyoengq hagseng caez guh haenx, hawj hagdangz engq nauhyied angqyangz.

Gujsanh Siujyoz genhciz guh ndei hong Cuengh Gun song saw vah sonhag saedniemh, ciemhciemh dawz vwnzva Bouxcuengh cuengq haeuj gwnzdangz, hawj hagseng youq ndaw heiqhom vwnzva minzcuz majhung, geij bi neix daeuj hagdangz genhciz banh gak cungj yinxdaeuz siujcuj hozdung, miz vehveh、sijcih、lanzgiuz、dijyuz minzcuz、foux saeceij、ngeihyienz doengh gijneix, hawj hagseng gagnyienh camgya caemhcaiq youq ndaw hozdung demgya cihsiz. Bineix, hagdangz youh doenghhong guh funghranz Ywcuengh caeuq ranzbaijcuengq, youq 9 nyied daej gaenq guhbaenz haicuengq, ndawde faenbied baij miz gij yw caeuq sawdan Ywcuengh youq dangdieg soucomz ma baij haenx, baij miz gij ciengjcang ciengjboi hagdangz lai bi daeuj aeundaej caeuq gij faengx hagseng gag suek doenghgij doxgaiq hagseng gag guh haenx, hagdangz 10 yiengh it dungxcaiz dinfwngz gungganq cienlanz doengh gijneix, hawj vunz yawj le roxyiuj lailai naemjsiengj lailai.

Yawjngonz sat seiz, Guengjsae Minzcuz Gyauyuz Fazcanj Cungsim cujyin Couh Gwzyih angq dwk doiq yaucangj Gujsanh Siujyoz naeuz, danghnaeuz dajfaen, gou hawj sou 100 faen! Guengjsae Swhfan Yozyen Codaengj Gyauyuz Yozyen fu’gyausou Liengz Cunh- lenz caemh angq dwk naeuz, gyoengq lwgnyez Gujsanh Siujyoz yienh’ok le cungj yienghsiengq cingsaenz gaenxgoemx guh baenaj ndeu, ndaej yawj ok hagdangz youq sonhag fuengmienh guh ndaej ndei, cingzcik yienhda.