Limqva golinzgaeq loenq lo, simva maj ok aen giuz- yungz hau ndeu. Raq rumz he bongj gvaqdaeuj, aen giuz- yungz dwggyaez neix bienq- baenz le geijcib aen gyang- lozsanj, youq laj mbwnlamz fwjhau riengz rumz mbinyag- yag.

Daxgoeng daengngoenz yawjraen le, caenciet daengq gyoengqde: “Gyoengq lwgnyez sou aeu geiq youq, gaej doek roengz gizdieg biujmienh henjrwgrwg haenx bae, gizde dwg sahmoz. Hix gaej deng baenz duj baenz duj va- ngaenz yaeuh, gizde dwg huzraemx, cijmiz gij namh ndaemndwtndwt, cij dwg gizdieg sou roengzrag maj mbaw haenx.

Gyanglozsanj iq daihsing han naeuz:“Cuengqsim ba, daxgoeng daengngoenz! Dou itdingh daengz ndaw namh bae roengzrag majhung!” Hoeng, miz song naed ceh cix mbouj yienghneix siengj, naed ceh he yawjyawj gij dieg baihlaj le naeuz:“Gij namh ndaemndwtndwt neix miz maz eiqsei! Yawj, gij dieg henjrwgrwg haenx itdingh miz haujlai baujboiq. Daengz gizde bae, gou itdingh bienq- baenz bouxfouq bakfanh.” Yienghneix, de couh mbin bae coh dieg sahmoz. Lingh naed ceh he doek roengz ndaw huzraemx bae, de daekeiq vauvau naeuz:“Najhuz yubyab hausagsag haenx, itdingh ndaej hawj gou angqyangz!”

Bi daihngeih seizcin, naedceh golinzgaeq doek youq ndaw sahmoz haenx gaenq hawq dai; naedceh doek youq ndaw huzraemx haenx caeux couh dumh dai lo; cijmiz gij ceh doek youq ndaw namh haenx maj hung maj noengq, gyoengqde youq laj ndit wenjyagyag haenx doxceng haiva, cang aen daihdeih ndaej engqgya gyaeundei.

(fouzmingz)