Guengjsae byaij haeuj 70 nienzdaih le, nungzyez aeu yungh vafeiz bienq ndaej yied daeuj yied lai. Moix bi haicin, gak aen swnghcanjdui caeuq vunzlai seyenz cungj da yawj duepduep dwk caj gungsiuhse gunghawj vafeiz, aenvih neix dwg aen vwndiz hung gvendaengz bineix haeux caeuq doenghgo dajgai ndaej mbouj ndaej demcanj ndeu. Hoeng, aenvih Guengjsae binaengz daj ndaw giva guekgya faenboiq faen ndaej vafeiz gig noix, swcigih ne youh mbouj miz gij cangj vafeiz hung bonjfaenh, daj guekrog cawx ma caemh nanz, ndigah ciengzciengz hawj vunzlai saetmuengh, vunzlai doiq gijneix yigen gig lai.

Gyoengq goengdaeuz swcigih ginggvaq nyinhcaen ngeixyaeng, cawz cungdenj fazcanj Liujcouh Vafeiz- cangj caeuq Hozciz Danfeizcangj le, gietdingh youq daengx gih daihlig fazcanj vafeizcangj iq. Veiz Gozcingh naeuz: “Guh vafeizcangj iq, gij yienh miz diuzgienh haenx ne gag bae guh, gij yienh mbouj miz diuzgienh haenx ne youz digih doengjit bae guh.”

Bi 1973, swcigih laebbaenz le aen lingjdauj siujcuj dazyinx vafeiz- cangj iq, doiq gij vafeizcangj iq bae rom ngaenzgoek、gunghawj yienzliuh、faenboiq canjbinj daengj cungj guh gidij baijbouh liux bae. Youq cauh sezbei gwnzde, sien comz ndaw swcigih 54 aen gihgaicangj hwnj- daeuj gonq, doxgap cauhguh 15 dauq sezbei baenzdauq bi ok 3000 dunh hozcwngzanh veican ndeu; riengzdwk youh youz Guengjsae daezgung nyuenz caizliuh, caeuq Sanghaij doxgap cauh 28 dauq sezbei baenz- dauq vafeizcangj iq haenx.

Aenvih vafeizcangj iq roengz- ngaenz noix, hwnjguh seizgan dinj, guh baenz le gag cauh gag yungh, caiq gyahwnj vafeiz yungh meiz gaenq miz baujcingq, ndigah, gak digih、yienh cungj gig cizgiz banh vafeizcangj iq. Daengz bi 1975, Guengjsae bi ok vafeiz ndaej 20.17 fanh dunh (ciet 100%).

Seiq aen veican gunghyez bang nungz, yungh gangdiet、meizdanq、nungzgih、vafeiz daeuj guh cujyau neiyungz haenx, aenvih noix ging- niemh, youh miz di hozgaenj luenh guh, cauhbaenz miz itdingh saindwi. Hoeng daj cingjdaej daeuj gangj, de daiqdoengh le haujlai gunghyez Guengjsae ndaej fazcanj, daezgung le goekdaej doxgaiq hawj nungzyez, rom le gingniemh caeuq cauh baenz diuzgienh hawj daengzcog guh gij hong gihgaiva nungzyez, ok gvaq rengz laux hawj Guengjsae guh hong ginghci.

(caengz sat)