Gou miz boux doengzhag ndeu, de daiq aen nganxciuq nanwt he, baenzngoenz boemz youq gwnz daiz sij cozyez. Mingzcoh de gou gaenq geiq mbouj ndaej lo, mboujgvaq, dou youq raeblaeng de cungj heuh de guh “daih’it mingz”. Aenvih mwh doeg gauhcungh, moix baez gaujsi de cungj ndaej daih’it mingz.

Miz baez mohnij gaujsi ndeu sat le, mbawbuengj baizvih hoengzfwg nem youq bakdou gyausiz giz ceiq lwenqda haenx, roengzdangz seiz, gou caeuq de itheij bae diengzhaex, byaij gvaq bakdou gyausiz seiz, gou haeujsim daengz daih’it mingz gaenq vuenh aen mingzcoh boux doengzgag wnq hwnjbae lo. Mwh gou daj diengzhaex dauqma, de lij soengz youq gizhaenx yawj dwk, lienz doengh cungj mbouj doengh, lumj duzyou nei mwnhswd, ndaw da de gig haemzndaenq gig dahoengz.

Gvaqlaeng, de itcig cingsaenz moengzloengz, lienz haeuxngaiz haeuxcaeuz cungj mbouj gwn. Banngaiz daengz bancaeuz itcig guh cozyez.

Ngoenzhaenx, daengngoenz aeng lumj feiz. Gou lumj bingzciengz nei bin hwnj 5 laeuz yangzdaiz bae yawj funghgingj, cuengqsoeng aensim. De hix boemz youq gwnz yangzdaiz, gyaeuj cix ngaem roengz bakaek bae. Gwnz diegdangz miz doiq baengzyoux iq ndeu cingq fwngz gaem fwngz buet dwk. Aen huzraemx rog hagdangz lumj aengingq nei ronghmyebmyeb, geij- cib duz roegcaeuq mbin youq gwnzmbwn.

Gou cienqndang yaek lizhai. sawqmwh, henz ndang gou lumjnaeuz miz duz roeghau hung ndeu bongh doek roengz laj laeuz bae. Danhseih…… “Daih’it mingz” cix ciengxlwenx dwg daih’it mingz lo.

Doeklaeng, hagdangz cuengqgyaj sam ngoenz.