Yizcouh Si Siengzbei Yangh Cungsim Siujyoz youq 1934 nienz laebguh. Seizneix, hagdangz ciemq dieg 19576.69 bingzfanghmij, aenranz ciemq dieg 2508.26 bingzfanghmij.

Siengzbei Yangh ndawde miz 15 aen cunh, 213 aen mbanj, daengx yangh gyawj 2 fanh vunz, 98% doxhwnj dwg vunz Bouxcuengh, vunzlai bingzciengz gangj Vahcuengh. Ciuq cingzgvang dangdieg banhhag, Siengzbei Yangh Cungsim Siujyoz baenz le giz sonhag Cuengh Gun song saw vah ndeu.

Daj guh Cuengh Gun song saw vah sonhag daeuj, aen hagdangz neix itsim ciuq minzcuz cwngcwz guekgya bae hengz, guh song saw vah sonhag; doengzseiz, vihliux hawj lauxsae caeuq bohmeh hagseng gya ndei goxgyau, aen hagdangz neix laebdaeb yawjnaek Cuengh Gun song saw vah, bingzciengz guh sonhag, doxcab gangj Vahcuengh Vahgun, baengh song cungj vah doxbouj doxcoi, guhdaengz baengh Vahgun gya ndaej cihsiz, aeu Vahcuengh gyalaeg roxyiuj.

Vihliux bauj ndaej goqdangz sonhag “caemh yawjnaek Cuengh Gun”, hagdangz anbaiz gig cingcuj, dawz hong hwnj dangzgoq Cuengh Gun song saw vah gvihaeuj ndaw gaujbingz cingzcik lauxsae bae. Doengzseiz dazyinx lauxsae nem hagseng youq bingzciengz gangj Vahcuengh Vahgun, hawj song baih engqgya huzndei.

Aenvih ranghdieg hagdangz liz singz gyae, caiq gya dwg dieg Bouxcuengh lai daih comzyouq, hagseng mbouj rox gangj Vahgun nem sij Sawgun, hagseng hag Sawgun haemq hoj, baenzneix caez aeu Vahcuengh Vahgun daeuj sonhag, ndeicawq lai raeuh bae, hix gig miz daegsaek. Youq hwnjdangz seizde, hagseng bungz daengz vwndiz mbouj rox, lauxsae aeu Vahcuengh daeuj gejdap, hagseng cungj lai ngaih roxyiuj.

2012 nienz, Cinz Gveimei lauxsae vixyinx hagseng yienj cezmuz《Goleux Hai Va》, camgya daengx gih siujhagseng aeu Vahcuengh biucinj doxdax yienj cezmuz, ndaej samdaengjciengj. 2014 nienz, hag- seng Cinz Cwzbangh camgya daihsam gaiq daengx gih siujhagseng aeu Vahcuengh biucinj doxdax gangj gojgaeq, aeundaej gujliciengj. Ndaej ciengj mbouj lai, hoeng neix yienh’ok aen hagdangz neix yawjnaek son- gyauq Cuengh Gun song saw vah.

Aen hagdangz neix guh Cuengh Gun song saw vah sonhag, mbouj apbik lauxsae nem hagseng, hawj gyoengqde gagnyienh son nem hag. Doiq doenghboux lauxsae nem hagseng mbouj rox Vahcuengh, cawzliux hwnj gij dangz daeng hwnj de, mbouj apbik gyoengqde hag Vahcuengh; aeu doxgiet、huzndei、gagnyienh dwk guh Cuengh Gun song saw vah sonhag. Dingh seiz youq laj geizguek gangjvah, youq gwnz bauqhwzbanj、bauqfwngzcau、lanz- senhconz, youq ndaw gvangjbo ndaw hagdangz daengj, cungj senhconz nem yungh Cuengh Gun song saw vah, hawj hagseng nem lauxsae rox guh Cuengh Gun song saw vah sonhag miz maz ndei. Mbouj dinghseiz guh hozdung, baijok gij cwngzgoj youq rog goqdangz doegyawj, lumj guh yienjgangj doxdax、doeg saw doxdax、gangj Vahcuengh doxdax、gangj gojgaeq Vahcuengh doxdax daengj, aeu neix daeuj yawj hagseng hag Cuengh Gun song saw vah ndaej baenzlawz yiengh, neix hagseng rox gangj ndei Vahcuengh, hix hag ndei Vahgun.

Siengzbei Yangh dwg aen diemj “hawfwen Liuz Sanhcej” ndeu, haemq mizmingz. Baez daengz haw Siengz- bei, dangdieg roxnaeuz diegwnq miz haujlai bouxgeq comz youq gwnz haw, aeu fwen daeuj lwnh saeh gvendaengz bonjndang ginggvaq、sevei hwngfat、guekgya fouqgiengz daengj. Gihvei gig ndei, aen hagdangz neix gaemdawz gihvei, anbaiz ndei seizgan, daiq hagseng bae gwnzhaw dingq bouxgeq eu fwen nem gangj gojgaeq, hawj hagseng lai rox vwnzva minzcuz, rox laemxsim swnjcienz roengzbae.