10 nyied 22 -23 hauh, hong yienhbaij cauxlaeb baenz “swcigih minzcuz gyauyuz vwnzva sifan hagdangz” nem yawjhag hozdung youz Swcigih Gyauyuzdingh cujciz banh haenx youq Gveigangj Si haiguh. Swcigih Gyauyuzdingh Minzcuz Gyauyuzcu cucangj Veiz Lanzmingz、 Gvangjsih Minzcuz Gyauyuz Hwngfat Cungsim cujyin Couh Gwyi、Swcigih Gyauyuzdingh Minzcuz Gyauyuzcu diuyenzyenz Couh Yungjgwz caeuq Gveigangj Si Gyauyuzgiz lingjdauj、 6 boux lauxhangz、 daengx gih gak si yienh（gih）106 aen cungh siuj hagdangz lingjdauj daiqbiuj doengzcaez camgya baez hozdung neix.

Baez hozdung neix muzdiz dwg cazniemh gij cwngzgoj bi 2014 laebdingh baenz “swcigih minzcuz gyauyuz vwnzva sifan hagdangz” cauxlaeb danhvei haenx, vanzlij yungh aen seizndei neix, vih gak cungh siuj hagdangz daezhawj cauxlaeb minzcuz vwnzva sifansing hagdangz aen gihvei ndeu gyauhliuz gingniemh, doicaenh gih raeuz cauxlaeb hagdangz sifan vwnzva minzcuz cindu caeuq ligdoh.（Couh Yi/周 玉）