Hwngzyen Sizdangz Cin Banhluz Cunhveij Siujyoz laeb youq 1968 nienz, dwg aen siujyoz cunh gaep, gak nienzgaep cungj miz, hix dwg Cuengh Gun song saw vah saedniemh hagdangz. Seizneix miz 460 boux hagseng (baugvat yozcenzbanh), cungj dwg vunz Bouxcuengh; lauxsae 21 vunz, miz 85% rox sonhag Cuengh Gun song saw vah.

Daj 1987 nienz guh Cuengh Gun song saw vah sonhag daeuj, aen hagdangz neix cungj ciuq “aeu Cuengh guhcawj, Cuengh Gun giethab, aeu Cuengh coi Gun, Cuengh Gun caez rox” “cibroek cih” fuengcim guh sonhag, sonyinx hagseng Bouxcuengh hag rox Cuengh Gun song saw vah, sawj lwgnyez Bouxcuengh dungxcaiz fat, uk engq raeh. Aen hagdangz neix hwngfat minzcuz gyauyuz, byaij ok diuz roen gag miz daegsaek ndeu; sonhag cizlieng onjdwt daezsang, gij rengz banhhag mboujduenh gyalai, mingz- daeuz youq ndawbiengz gya ndei, coengh ndawbiengz son’gyauq ok buek dem buek vunzcaiz maenhndei.

Hagdangz haenqrengz daj song fuengmienh guh ndei hong sonhag Cuengh Gun song saw vah, guh ndei hong son lwgnyez haeujhag gaxgonq, beizyangj gyoengq lauxsae sonhag Cuengh Gun song saw vah. Lwgnyez youq duenh yozcenzbanh, couh sonhag Sawcuengh, son rox sing、yinh、diuh、gyoepyaem Sawcuengh、doeg Sawcuengh、sij Sawcuengh; youq itnienzgaep hainduj guh Cuengh Gun caemh yamq sonhag. Hagseng bizyez seizde, Sawcuengh、Sawgun suijbingz cungj hab iugouz. Daj 1992 nienz daeuj, gaenq miz 280 boux hagseng, hag le Cuengh Gun song saw vah, gauj ndaej hwnj dayoz roxnaeuz cunghconh.

Guh Cuengh Gun song saw vah sonhag, aen hagdangz neix soqlaiz dawz hong beizyangj lauxsae coz dangguh yiengh hong daeuz ndeu, haenqrengz bae guh, dingh ok cosih ndei, couhdwg “daenz rapnaek, dingh hwngfat muzbyauh; guh mbaeklae, ndaej hwnjsang baijok; gya giekdaej, hawj sonhag lai ak; laeb bingzdaiz, hawj lauxsae guh ndaej saeh, hagdangz ndaej hwngfat”, coi lauxsae sonhag Cuengh Gun song saw vah ndaej daezsang suijbingz. Gyoengq lauxsae ndaw hagdangz guh hong liux laebdaeb cungjgez ging- niemh, ra ok gvilwd sonhag Cuengh Gun song saw vah, gaenxmaenx rapdawz hong hwnj dangz sonsaw yenzgiu、dangz hawj vunz ngonzyawj、dangz guhyiengh daengj hong sonhag yienh gaep; bingzciengz gaenxmaenx hag gocwngz gaijgwz lijlun nem gingniemh ndei, gaemdawz fap sonhag, Cuengh Gun doxgap, aeu Cuengh coi Gun, yungh daeuj guh hong sonhag.

Gaenh geij bi neix, aen hag- dangz neix youz Swcigih Gyauyuz- dingh Minzcuz Gyauyuzcu nem yienh gyauyuzgiz daiqlingx, gawjbanh nem camgya lai cungj Sawcuengh doxdax hozdung. 2010 nienz haggeiz seizcou, Banh Gveili lauxsae camgya daengx gih lauxsae Cuengh Gun song saw vah doxdax aeu Cuengh Gun song vah gangj saw, aeundaej ngeihdaengj- ciengj. 2012 nienz haggeiz seizcou, aen hagdangz neix gawjbanh hoz- dung, doxdax hwnj dangz baijyienj aeu Cuengh Gun song vah doxgyau; 2013 nienz haggeiz seizcou, gawj- banh hozdung doxdax hwnj dangzgoq maenhndei Cuengh Gun song saw vah, 2011 nienz nem 2014 nienz haggeiz seizcin, guh hozdung doxdax gangj saw, guh ndaej haemq ndei, hawj lauxsae ndaej gya miz ging- niemh, coicaenh hongsaeh sonhag Cuengh Gun song saw vah ndaej hwngfat. Aen hagdangz neix coengh ndaw yienh banh le haujlai hozdung, baugvat hagseng doxdax aeu Vahcuengh biucinj gangj gojgaeq、doxdax gveihfan sij saw、doxdax doeg govwnz、doxdax sij faenzcieng Sawcuengh daengj; hagseng gaenx- maenx camgya, laemxsim roengzrengz doxdax, cungj ndaej cingzcik ndei. 2014 nienz seizcou, gih raeuz gawjbanh daengx gih daihsam gaiq siujhagseng doxdax aeu Vahcuengh biucinj gangj gojgaeq, aen hagdangz neix hagseng Hoz Gvanghdaz camgya, aeundaej ngeihdaengj- ciengj.