Aen geiqmaeuz Daeglauh miz di gvaqbouh, de nyinhnaeuz doiqfouq Vangz Fuzgauh cungj vunz neix mbouj ndaej sim’unq lai, aeu simgeng cij baenz. Ndaw sim Ai Lujci roxyiuj, Daeglauh dwg siengj yungh fapyak daeuj doiqfouq Vangz Fuzgauh. Daeglauh youq gwnz haw miz bang baengzyoux he, mingzhauh heuh Liujyezbangh, cienmonz dawz mid haih vunz, caenh’aeu miz vunz hawj ngaenz, gyoengqde gijmaz hong cungj gamj ciep. Sengj densidaiz miz boux daujyenj he yaeuh dahsau yienhsingz he, yenjyenz dang mbouj baenz lij ngaiz rodlwg dem, gvaqlaeng cij rox de caenh dwg boux daujyenj dungman he. Daxboh dahsau heiqndat raixcaix, ok fanh maenz ngaenz he cingj Liujyezbangh, daujyenj deng gvej buenq aen rwz, lij ngaiz vunz fat aen siengq de hwnj gwnz muengx bae dem. Daeglauh naeuz, de ngaek gyaeuj couh baenz, mbouj yungh de ok naj, cienzbouh dwg Liujyezbangh guh liux. Ai Lujci hix siengj gvaq yungh gij fuengfap yaemdoeg neix, gvaqlaeng de gag naemj, danghnaeuz Liujyezbangh banh saeh gvaqbouh, ok saeh le baenzlawz guh? Yungyiemj lai, de mbouj ndaej baenzneix guh.

Ai Lujci raen gij singyaem songde yied gangj yied sang, lumjbaenz yaek laeujfiz lo, couh naeuz:“Gij vah sou gangj haenx gou cungj dingq haeuj ndaw rwz bae lo, gou nyinhnaeuz cungj gangj ndaej miz dauhleix. Gou Ai Lujci yienznaeuz mbouj suenq dwg vunzndei, mboujgvaq hix gangj dauhleix、gangj faplwd. Baenzneix ba, dou bae ra de gangj dauhleix gonq, yawj de baenzlawz guh caiq gangj.”Liuz Fudai ngaek gyaeuj naeuz:“Baenzneix ndei, baenzneix ndei.”

“Ndei diuz viz, cejfou mwngz sim’unq lumj saejmou nei, gou mbouj saenq mwngz gamj bae gauq de.”Daeglauh daliuq Ai Lujci naeuz.

Daeglauh baez yoeg, Ai Lujci lumjbaenz heiqndat lo, yaengx byongh cenj laeuj hwnjdaeuj ndoet cengh liux, youh yungh rengz cuengq aen cenj daengz gwnz daiz, rongx naeuz:“Byawz gangj gou mbouj gamj? Bae!”(Caenhguenj ndawsim de roxyiuj Vangz Fuzgauh mbouj youq ranz, cix itdingh aeu bae.)

Laj din Byahojlieng hamq Dahdozniengz, doengh laeuz cib caengz he beij gij ranz bouxwnq sang baenz duenh, lumj duzhag ndwn youq ndaw gaeqbang nei. Neix dwg doengh laeuzmoq he, sam caengz doxhwnj lijcaengz cangcoih, mbouj raen saek giz rongh daeng, laepcupcup byaij gvaqbae cungj dwglau raixcaix. Gizneix couh dwg aen ranz daihlauxbanj gwnz haw、Gunghbauj Gungbinj Sanghmau Gunghswh cungjginghlij Vangz Fuzgauh. Ngamq daengz banhaemh gouj diemj buenq, aen douhung ranz Vangz gaenq haep maenhsaedsaed lo, aen ding caengz baihlaj caeuq baihgvaz baihswix song aen fuengz hix ndaemndatndat, caenhmiz aen fuengz caengz daihngeih miz di rongh he daj ndaw geh yiemhcueng laeuh okdaeuj, gangjmingz doengh laeuz neix lij miz vunz youq, hoeng gij vunz ndawde mbouj siengj hawj bouxwnq gauxca.

Baez bongx dou, duzma ndaw ding caengz laj couh raeuqvouxvoux. Gvaq geij faencung le, cij miz vunz hai aen daeng bakdou laeuz, aen douhung hai diuz geh he, aen gyaeuj mehmbwk he ndoj okdaeuj, coh Daeglauh cingq bongx dou haenx rongx:“Bongx baenz rengz guhmaz, bongx dou lumj byajbag nei.”

“Dou daeuj ra Vangz lauxbanj, de youq ranz lwi?”Daeglauh hix hemqcaca, daengx bak cungj dwg heiqlaeuj.

“Sou, ra loek dieg lo.”Mehmbwk gingjgaeh dwk yawj gyoengqde, gangj sat couh yaek gven dou.

Ai Lujci ganjgip daj baihlaeng Daeglauh caeuq Liuz Fudai yat okdaeuj, riuhehe naeuz:“Cinz canghyw, Cinz canghyw, gou dwg Laujai. Mwngz gwn caeuz gvaq mboujcaengz?”

“O, laxlawz dwg Laujai ha, mwngz caiq mbouj oknaj gou couh cuengq duzma haeb vunz lo.”Mehmbwk daegdaengq yungh rengz gangj cih haeb.

“Gou, gou youq baihlaeng cit ien hane.”Ai Lujci riunyumj naeuz.

“Laujai, banngoenz banhaemh mwngz cungj faen mbouj cingcuj lwi? Seizneix seizlawz la, byawz caengz gwn caeuz ha!” Mehmbwk damzbedbed.

“Gou siengj daeuj caeuq Vangz lauxbanj gangjgoj, de youq ranz lwi?” Ai Lujci siujsim yupyup dwk cam.

“Laujai, mwngz cam gou? Gou lij siengj cam mwngz aeu vunz ne. Mwngz dwg fucungj de mwngz cungj mbouj rox de youq gyawz? Sou dwg doxgap yaeuh gou loba?”Mehmbwk mbouj gangj saek gawq vah ndei.

“Cinz canghyw, mwngz gaej baenzneix gangj, gou caeuq Vangzcungj miz ndwen he mbouj raennaj lo. Cawzcou gvaq le, de mbouj hawj ngaenz, gou baenzlawz bae sou huqdoj ne?”

Mehmbwk naeuz:“Laujai, gij saeh sou guh seng’eiq mbouj gven gou, Vangz Fuzgauh de guh gijmaz hix mbouj gven gou. Mwngz youq gyawz raen de, mazfanz bang gou rag de dauqdaeuj. Dahlwg gou yaek gietvaen lo, ranzcaen yaek raen daxboh de bw!”

Mehmbwk gangj sat “gvaengz”sing he couh haep doudiet lo, gij singyaem de lumj fagciz nei moeb daengz aen sim Ai Lujci bae. Sam boux vunz ngawh youq bakdou, haujlai nanz cungj mbouj diem ndaej heiq.

Mehmbwk swnh fwngz hix gven aen daeng naj laeuz, seiqlengq sikhaek laepcupcup, duzma ndaw laeuz lij luenh raeuq. Gizneix liz diuzgai lij miz ngeih、 samcib mij, ronghdaeng daj diuz hongh nyaeq ingj gvaqdaeuj, daengx diuzgai caemrwgrwg. Ai Lujci gagnyinh caj roengzbae hix mbouj miz yungh, couh daiqdaeuz byaij coh diuz hongh, Liuz Fudai caeuq Daeglauh cit ien bak ngaemx riengz baihlaeng.(4)

阿捞的主意则有些极端，他觉得对付黄福高这种的人就不能软，应该来硬的。阿捞所说的硬是什么艾鲁志都晓得，无非就是走黑道那一套，以恶制恶，以牙还牙。他仗的是有一帮街上友仔，名号柳叶帮，专靠刀子伤人，那些人只要有钱什么活都敢接。省城电视台有个导演骗了县城一个女孩子，演员当不成还坠了胎，后来才晓得他只是个动漫导演。女孩父亲气愤不过，花了一万块请柳叶帮，导演被割了半只耳朵，照片还在网上广为扩散。阿捞的意思很明白，只要他点头，这事完全可以让柳叶帮代办，不用他出面。艾鲁志不是没想过这一手，不过这是阴招黑招毒招，柳叶帮心狠手辣，万一出事怎么办？这么干风险实在太大了。以他的性格和为人，绝对不能这么做。

艾鲁志看到两人的说话声越来越大，情绪和酒力都有些失控了，便总结似地说：“你们说的我都听进耳朵里了，我觉得说的都有道理。我艾鲁志虽说不是什么鸟君子，不过也是讲道理、讲法律的。这样吧，我们来个先礼后兵，先找他谈谈，摸到他一点底细再讲。”

刘富泰点头说：“这样好，这样好。”

“好个鸟，姐夫你这么心软腿软猪大肠样的，我不信你敢去找他。”阿捞轻蔑地斜视着艾鲁志，目光里充满了挑逗。

艾鲁志似是被激怒了，端起半杯酒就往嘴里倒个底朝天，又用力地把杯子往桌上一搁，大声说：“哪个说老子不敢？走！”（明知黄不在家，却一定要去。）

在驮娘河边火亮山脚下，一栋十层的楼房比其他民房高出一大截，显得鹤立鸡群。这是一栋新楼，三层以上还未装修，没有星点光亮，黑黝黝的显得有些吓人。这里正是镇上的土特产大老板、宫保贡品商贸公司总经理黄福高的家。才是夜晚九点半钟，黄家已经大门紧闭，一层大厅和左右两个房间都淹没在黑暗中，只有二楼的右边房间的窗帘缝隙中，透出一线暗黄的灯光，表明这栋建筑还有人在里边居住，但里边的显然不想让别人打扰。

一阵激烈的敲门声打破了寂静，一楼大厅里随即响起了一阵狗吠声。约摸过了两分钟，才有人拉亮了楼门前的电灯，防盗门闪开一道缝，探出一个女人头，朝前边敲门的阿捞吼叫：“敲什么敲啊，敲门像打雷样的。”

“我们来找黄老板，他在家吗？”阿捞也不示弱，满嘴酒气地说。

“你们，找错地方了。”女人警觉地扫了一眼，说着就要关门。

艾鲁志赶紧从阿捞和刘富泰身后闪出来，挤出笑容说：“岑医生，岑医生，是我老艾。你吃过晚饭没有？”

“噢，原来是老艾啊，你再不出面我就放狗咬人了。”女人故意把狗字咬得很重，气势压人。

“我，我在后面抽烟哩。”艾鲁志又挤出笑容说。

“老艾，白天黑夜你都分不清啊？都什么时候了，谁还不吃晚饭啊！”女人没好气地说。

“我想来跟黄老板聊聊，他在家吗？”艾鲁志小心翼翼地说。

“老艾，你问我？我还想问你要人呢。你是他副总你都不懂得他在哪里？我看你们是合伙耍我的吧？”女人满口没一句好话。

“岑医生，你莫这样子讲，我和黄总都一个月没碰面了。秋收过了，他不给钱，我怎么去收土特产呢？”

女人说：“老艾，你们做生意不关我的事，黄福高他干什么也不关我的事。你在哪里见到他，麻烦帮我拎回来吧。我女儿要结婚了，对方亲家要见他这个爹呢！”

女人说着咣当一声把铁门关了，发出沉钝的闷响，像一记重锤重重地击打在艾鲁志心上。三个人愣在门前，一时没有缓过神来。

女人顺手把楼前的灯也关了，四周迅速暗黑下来，里边的狗继续汪汪地乱吠。这里距离街道还有二、三十米，街灯从狭窄的小巷斜射过来，显得有些阴森。艾鲁志觉得没有再呆下去的必要，就率先迈开步子往幽暗的小巷走，后边的刘富泰和阿捞边吸烟边闷声跟在后边。

（四）