10 nyied 21 hauh, Swcigih Sinhvwnz Cuzbanj Gvangjden Giz youq Vujmingz Yen ciuhai Daengx Gih Hong Vah Minzcuz Gvangjbo Densi Cezmuz Codanzvei. Swcigih Sinhvwnz Cuzbanj Gvangjden Giz dangjcuj fusuhgi、fugizcangj Cinz Yizgungh camgya haihoih caemhcaiq gangj vah guh cijdauj, Swcigih Minzyijveij fucujyin Yangz Gijbyauh wngqiu camgya haihoih caemhcaiq gangj vah. Gvangjsih Yinzminz Gvangjbo Dendaiz、Gvangjsih Densidaiz、 swcigih caeuq mizgven si yen (si、gih) sinhvwnz cuzbanj gvangjden bouhmonz bouxfucwz gungh 46 vunz camgya codanzvei.

Cinz Yizgungh youq gwnz hoih dauqyawj le geij bi neix daeuj gij cujyau cingzcik caeuq gihbwnj gingniemh vah minzcuz gvangjbo densi saehnieb gih raeuz aeundaej haenx. De naeuz, gaenh geij bi neix daeuj, daengx gih gak gaep sinhvwnz cuzbanj gvangjden bouhmonz gig yawjnaek hong vah minzcuz gvangjbo densi, youq senhconz、minzcuz、minzyij daengj mizgven bouhmonz haeujcoengh caeuq boiqhab baihlaj, fanhoiz caeuq boqcuengq vah minzcuz gvangjbo densi cezmuz, cungj hwngfat haemq daih, daengx gih gaenq miz 24 aen si yienh haiboq le vah minzcuz gvangjbo densi cezmuz. Hoeng, gij hong vah minzcuz gvangjbo densi gih raeuz hix miz haujlai hojnanz mbouj ndaej yawjsiuj, cujyau dwg cezmuz neiyungz mbouj gaeuq fungfouq, cienzngaenz mbouj cuk、 vunzcaiz giep noix, sezbei daiq gaeuq daengj. De daez naeuz, swcigih、si、yienh aeu caez ok rengz, sam gaep lienzdoengh, caez laeb guh gwzgiz moq daengx gih vah minzcuz gvangjbo densi cezmuz, dajcaux cinghbinj.

Yangz Gijbyauh daiqbiuj Swcigih Minzyijveij cukhoh gih raeuz vah minzcuz gvangjbo densi saehnieb aeundaej cingzcik daih. Gij cingzcik neix dwg daihgya doengzcaez roengz- rengz guhbaenz, Swcigih Minzyijveij baezlaeng yaek laebdaeb boiqhab gvangjden bouhmonz guh ndei cungj hong neix. De daez naeuz, aeu guh ndei baujcang dijci, gyagiengz haeuj- laeg diuyenz daengx gih hong vah minzcuz gvangjbo densi, yenzgiu ceihdingh cungjdaej iugouz caeuq hwngfat muzbyauh, ceng’aeu dawz gij hong neix nabhaeuj daengz ndaw hong cangzgveih cwngfuj bae.

Youq gwnz codanzvei, Gvangjsih Yinzminz Gvangjbo Dendaiz、Cungz- coj Si Gvangjbo Densidaiz、Vujmingz、Cingsih daengj sinhvwnz cuzbanj gvangjden bouhmonz bouxfucwz gonqlaeng guh le denjhingz fazyenz.

(Luz Yaujli/陆晓荔 Moz Liujgvei/莫柳桂)