Lozyez Yen Dungzloz Cin Bingzcai Siujyoz youq Mbanjbingzcai, liz yienhsingz 2 goengleix gyae; laeb youq 1942 nienz. Aen hagdangz neix ciusou lwgnyez 15 aen mbanj, baugvat 584 ranz 2180 vunz. Hagdangz dieg gvangq 2800 bingzfanghmij, gencuz menciz 2123 bingzfanghmij, miz song doengh laeuzsonhag nem doengh ranz- gwnngaiz hagseng ndeu, doengh- yiengh sonhag boiq miz haemq caez. Ndaw hagdangz seizneix miz 20 boux lauxsae, 11 boux miz daconh yozliz, 5 boux miz bwnjgoh yozliz, lauxsae hab iugouz caez. Seizneix miz 7 aen ban, gungh 246 boux hagseng, ndawde Bouxcuengh 109 vunz, ciemq cungjsoq 44.3%; lwgnyez hab haeuj- hag cungj haeuj caez lo.

Lai bi daeuj, aen hagdangz neix itsim hopheux “aeu Cuengh guhcawj, Cuengh Gun giethab, aeu Cuengh coi Gun, Cuengh Gun caez rox” “cibroek cih” fuengcim neix guh hong song saw vah sonhag, cingzcik yienhda.

Ranghdieg gvi Bingzcai Siujyoz ciusou hagseng de, dingzlai vunz dwg Bouxcuengh, ndawde dingzlai lwgnyez daj iq couh gangj Vahcuengh. Dangqnaj, Bouxcuengh dangdieg gangj Vahcuengh nem Vahgun. Aen sigij gonq 80 nienzdaih, Bingzcai Siujyoz ndaej dingh guh Sawcuengh haeuj hagdangz saedniemh hagdangz. Ndaw hagdangz miz song boux lauxsae dwg hag Sawcuengh conhyez, songde rapdawz hong sonhag Sawcuengh; moix singhgiz moix aen ban hwnj song dangz Sawcuengh; moix singhgiz sam nem singhgiz haj cungj hwnj dangz vwnzva minzcuz. Youq sonhag dijyuz seizde, cab haeuj mbangj minzcuz dijyuz, lumj fouxfaexsaux、caij- maxgyaek daengj; hwnjdangz meijsuz doenghfwngz, lauxsae son hagseng dinfwngz ngaihrox gvendaengz raed ceij ndawbiengz, hawj hagseng ndaej guh’angq, youh ndaej swnjcienz vwnzva minzcuz, lai rox cihsiz lai miz dinfwngz.

Dangguh ndaw yienh aen hag- dangz lajmbanj ceiq hung, “denswjva sonhag” cungj dwg yiengh daegsaek hung ndeu, aen hagdangz neix ciep vangjloz, moix aen ban cungj miz dennauj ciepdoeng vangjloz. Baengh dohmeizdij guh sonhag, hawj hagseng sim’angq dwk hag ndaej cihsiz.

Doengzseiz, aen hagdangz neix yawjnaek hong beizyangj lauxsae. Moix haggeiz cungj senj nem soengq lauxsae bae baihrog hagsib、dingq vunz hwnjdangz, hawj lauxsae ndaej daezsang suijbingz. Gaenh 5 bi neix daeuj, gungh miz 8 boux lauxsae fatbiuj lunvwnz roxnaeuz ndaej ciengj. Youz lauxsae sonhag Cuengh Gun song saw vah daiqlingx hagseng, camgya Gvangjsih siuj- hagseng doxdax yienj cezmuz Vahcuengh nem Gvangjsih siujhagseng doxdax aeu Vahcuengh biucinj gangj gojgaeq daengj, cungj aeundaej baizmingz ndei.

Lai bi daeuj, hagdangz ciuq cingzgvang guh sonhag, daengxcungq lauxsae doengzcaez haenqguh, sonhag cingzcik ndaej onjdwt daezsang. Moix haggeiz doeksat gaujsi, caeuq doengzloih hagdangz doxbeij, cingz- cik baiz youq baihnaj, ndaej vunzlai nem lingjdauj ndaw yienh、gyauyuzgiz haenhndei.

Seizneix, baengh gyoengq laux- sae maenhndei akgiengz, mozsi sonhag miz yungh, goqdangz anbaiz hableix, vwnzva hagdangz noengzna, aen hagdangz neix guh hongsaeh sonhag Cuengh Gun song saw vah, haengjdingh bi beij bi lai ndei dem.