10 nyied 12 hauh banhaemh, bi 2015 daengx guek fazyen Cuengh Gun Sueng vah fazgvanh beizyinbanh youq Gvangjsih Fazgvanh Yozyen haiban. Swcigih Gaugaep Yinzminz Fazyen fuyencangj、 Gvangjsih Fazgvanh Yozyen yencangj Dai Hungzbingh, Swcigih Minzyijveij fucujyin Yangz Gijbyauh caeuq Swcigih Gaugaep Yinzminz Fazyen、Swcigih Minzyijveij、Gvangjsih Fazgvanh Yozyen mbangj bouxfucwz camgya haiban yizsi.

Baez beizyin neix seizgan dwg 10 nyied 10 hauh daengz 31 hauh, gungh miz 35 boux gihcwngz fazgvanh dieg Bouxcuengh camgya beizyin, ndawde Gvangjsih miz 31 boux, Yinznanz miz 4 boux.

Beizyinbanh iucingj Gvangjsih rog gih ndaw gih bumwnz guh hong vah saw minzcuz mbangj lingjdauj、 lauxhangz vwnzva vahgangj Bouxcuengh、 fazyen lingjdauj caeuq fazgvanh maenhndei daeuj hwnjdangz. Hwnjdangz neiyungz baugvat swnjcienz caeuq baujhoh vwnzva Bouxcuengh、gij gangjok caeuq gaeudoeng Vahcuengh、 Sawcuengh giekdaej daengj.

Haiban yizsi sat le, Yangz Gijbyauh daiqbiuj Swcigih Minzyijveij gien buek saw vwnzva vahgangj Bouxcuengh caeuq Sawcuengh ndeu hawj Gvangjsih Fazgvanh Yozyen, hawj yozyenz guh sawson beizyin caeuq sawcamgauj, vanzlij aeu 《Hab Saedsaeh, Guh Ndei Hong Gvangjsih Cuengh Gun Sueng Vah Fazgvanh Gungganq Beizyin》 guh daez, hwnj le dangz goq daih’it baez beizyin neix.(Liengz Cingz\梁 晴)