Mboengqneix, Siengcouh Yen Swcunh Cin Hijliz Cunh gunghgung hozdung ciengzdieg miz yienghsiengq moq, cunh laeuzcunghab gak cungj baizbenj、 senhconz banjbau bauqdaeuz cungj yungh Cuengh Gun song cungj saw sij, neix hauh’ok Siengcouh Yen mbanjsifan yungh Cuengh Gun song cungj saw daihdaej guhbaenz.

Mbanjhijliz dwg aen mbanj seiq aen minzcuz comzyouq he, daengx mbanj 459 vunz, ndawde vunz Bouxcuengh ciemq 87%. Gaenh geij bi neix daeuj, aen mbanj neix aeu coicaenh gak aen minzcuz doengz- caez cinbu caeuq hwngfat guh muzbyauh, netsaed haiguh minzcuz doxgiet cinbu cauxlaeb hozdung, roengzrengz swnjcienz Sixcou daengj minzcuz vwnzva, haenqrengz hwngfat dajndaem makit、makbizbaz daengj daegsaek canjnieb, coicaenh daengx mbanj minzcuz doxgiet、 ginghci riengjvaiq hwngfat, gonqlaeng ndaej daengx guek、 daengx gih minzcuz doxgiet cinbu mozfan cizdij、 gih veiswngh cunh、 si vwnzmingz cunh daengj cwngheuh.

Riengzdwk aen mbanj neix yied daeuj yied okmingz, gij vunz daeuj aen mbanj neix hagsib、 yawjngonz youzcet de yied daeuj yied lai, vih coicaenh doigvangq leihyungh Sawcuengh, hawj engq lai vunz roxnaj Sawcuengh、 hagsib Saw- cuengh, vih engq ndei haiguh swnjcienz、 baujhoh caeuq sawjyungh Sawcuengh dwkroengz giekdaej maenhndei, Siengcouh Yen Minz- yijgiz yiengq Swcigih Minzyijveij cingjgouz 3 fanh maenz cienz haeujcoengh, haiguh hong Saw- cuengh haeuj mbanj, hwnjguh le Hijliz mbanjsifan yungh Cuengh Gun song cungj saw.

(Veiz Veimingz/韦卫明)