Caeux couh dingqnyi Namzningz Si Luzdangz Minzcuz Siujyoz youq Sawcuengh sonhag fuengmienh gig miz daegsaek. Geij ngoenz gonq, gou hozhaenz bae cunzcam cimhdamq goekgaen. Daj Namzningz sigih hwnjdin, yiengq baihbaek Namz—Vuz ngeihgaep goengloh haici, samsib lai goengleix couh daengz Namzningz Si Hinghningz Gih Luzdangz Cunh, raen daengz Luzdangz Minzcuz Siujyoz.

Luzdangz Minzcuz Siujyoz youq 1956 nienz 8 nyied laebbanh, dangqnaj hagdangz miz 8 aen ban, gungh miz hagseng 191 boux, lauxsae habgek 17 boux, lij hwnj ndaej song doengh laeuzsonhag, menciz 1169 bingzfuengmij. Lai bi daeuj, youq Swcigih Gyauyuzdingh Minzcuz Gyauyuzcu caeuq singzgih gyauyuzgiz nem gak gaep dangjveij cwngfuj sonyinx baihlaj, hagdangz aeu “hawj moix boux hagseng cungj ndaej daengz cungfaen fazcanj” guh banhhag leixniemh, cienzyiengz caeuq baujciz minzcuz vwnzva, guh song saw vah sonhag, hawj sonhag cizlieng ndaej daengz mboujduenh daezsang, caemh aeundaej cingzcik maenhndei. 2008 nienz Yanghgangj Densidaiz daeuj cunzcam, 2011 nienz, Swcigih Gyauyuzdingh Minzcuz Gyauyuzcu cujciz daengx gih song saw vah sonhag hagdangz yaucangj daengz hagdangz yawj- ngonz. 2013 nienz 3 nyied, Gyahnazda Aihdwzmungzdun Si Gyauyuzgiz cungsim cujyin Cinh- nizswh caeuq Ah’wjbwzdaz Dayoz Vujcouh gyausou caenndang daengz hagdangz cunzyawj dingqgoq. 2014 nienz 5 nyied, hagdangz ndaej Swcigih ciengj hawj “minzcuz vwnzva gyauyuz sifan hagdangz” cwngheuh. 2014 nienz ndaej Namzningz Hinghningz Gih bingzguh “hagdangz bingzan” cwngheuh.

Aen hagdangz neix lauxsae bouxboux rox Sawcuengh, bouxboux rox song saw vah sonhag, couh ndaej hawj sonhag caetliengh miz yauq guh ndei. Gij guhfap de dwg:

(1)Hagdangz ca ndei yozcenzban Sawcuengh yijvwnz goekdaej sonhag. Daih’it, hagdangz ciuq lwgnyez ngamq haeuj hag daegdiemj, gohyoz hableix bienbaiz hwnjdangz gocwngz. Daihngeih dwg dingh ndei sonhag muzbyauh, giethab vahbonjdieg sonhag Vahcuengh byauhcunj. Hag- dangz yauhgiuz lauxsae ciuq caetliengh guh ndei, hawj hagseng ndaej “seiq rox”, rox sing yinh diuh gyoepyaem, daezsang hagseng nyinhdoeg naengzlig,

(2)Hagseng haeuj daengz it nienzgaep, daih’it yungh song aen singgeiz daeuj un Sawcuengh singmeh yinhmeh caeuq singdiuh, yienzhaeuh doenggvaq singmeh yinh- meh doegyaem caeuq Sawgun gyoepyaem guh gvilwd doxbeij, yungh Sawcuengh gyoepyaem daiq Sawgun gyoepyaem. Daj yozcenzban daengz it nienzgaep, hagseng hagsib caetliengh cungj ndaej daengz bienqvaq, song saw vah gyoepyaem cungj rox.

(3)Youq song saw vah doengz- seiz sonhag ndawde, gvancez saed- hengz “aeu Cuengh guhcawj, Cuengh Gun giethab, aeu Cuengh coi Gun, Cuengh Gun cungj rox” cibroek cih fanghcinh, fazveih gij youhsi Sawcuengh, haigvangq cihsiz mienh hawj hagseng rox. Song saw vah sonhag moix aen singgeiz cungj demgya hwnj song dangz. Youq sonhag hozdung ndawde, gvancez saedhengz “aeu hagseng guhcawj, lauxssae guh cijdauj, lienhguh baiz gaxgonq”, naek youq beizyangj hagseng doengh fwngz doengh bak doengh uk naengzlig, gyamaenh hagseng gij cihsiz hag rox de.

Hagdangz lingjdauj moix hag- geiz dinghgeiz roxnaeuz mbouj dingh geiz daengz bangaep dingq go 25 dangz doxhwnj, caemhcaiq caeuq lauxsae cungjgez doxgyau hong sonhag. Gyaudaujcu nyinhcaen ca ndei sonhag guenjleix, doiq lauxsae sojmiz hong sonhag cungj guenj ndei. Daengz haggeiz gyang caeuq haggeiz satbyai cungj genjcaz hong sonhag guh ndaej baenzlawz yiengh, faensik sonhag cizlieng, daez ok cosih gaijndei.

Hagdangz laeb ndei aen duivuj lauxsae vunzsoq cukgaeuq、suciz haemq sang ndeu, ndaej baujcwng sonhag cizlieng mboujduenh daez- sang. Lij gujli lauxsae doenggvaq mbouj doengz roenloh hagsib daezsang vwnzva conhyez suijbingz. Geij bi gvaqdaeuj, hagdangz miz 5 boux lauxsae ndaej bingz guh swcigih doihengz Sawcuengh bouxsenhcin, 2 boux ndaej bingz guh Namzningz Si youhsiu sausenhdui fujdaujyenz, 3 boux ndaej bingz guh Namzningz Si minzcuz doxgiet senhcin goyinz, lauxsae ndawde miz 40 vunz (baez ) ndaej bingz daengz sigaep doxhwnj cijdauj ciengj, miz 94 bien lunvwnz ndaej sigaep doxhwnj doxdax ciengj, miz 3 bien lunvwnz ndaej sou haeuj Gvangjsih Gyauyuzdingh bonj saw 《Cuengh Gun Song Vahsaw Lunvwnzciz》, miz 30 lai bien hagseng cozvwnz youq gwnz Gvangjsih Minzcuz Bau fazbyauj.

Hagdangz yaucangj Vangz Yizlaiz cungmuenx saenqsim doiq gicej naeuz: Gyoengqdou yaek mboujduenh roengzrengz doihengz Sawcuengh sonhag cibroek cih fanghcinh, cungfaen fazveih Saw- cuengh youhsi, youq sonhag caet- liengh gwnzde mboujduenh cungjgez,daihdamj cauxmoq, hawj hagdangz caencingq banh baenz aen hagdangz yienghndei minzcuz gyauyuz ndeu bae roengzrengz guh.