Gaxgonq saedceij gvaq ndaej mbouj ndei, daxdaiq gwn le haujlai haemz, ceiqgaenh ranz gou vuenh ranz hung lo, ndigah daxboh daxmeh couh ciep daxdaiq haeuj singz daeuj yiengjfuk.

Ngamq hainduj, daxdaiq roxnyinh gijmaz cungj saensien, youq ndaej gig anyienz. Hoeng mbouj geij nanz, de couh hainduj bienq ndaej nyapsaebsaeb lo, cungj naeuz gizneix mbouj lumj lajmbanj ndei. Gou dingq le, ngeizvaeg raixcaix. Daxboh daxmeh sim’in daxdaiq, gijmaz saeh cungj mbouj hawj de guh, de couh ciengzciengz ngaezngwd naengh youq naj aendensi. Youh gvaq duenh seizgan he, daxdaiq cungj naeuz ndang mbouj cwxcaih, de yawj hwnjbae cingsaenz gig ca, lumj baenz bingh naek nei. Daxboh daxmeh ganjgip daiq daxdaiq bae yihyen genjcaz, hix caz mbouj ok gijmaz bingh. Doeklaeng, daxdaiq caeuq daxboh daxmeh ngaeq bae ngaeq dauq le, dou cijndei buenx daxdaiq ma ranzcoj lajmbanj youq geij ngoenz.

Caen geizheih, daxdaiq baez ma daengz ranzcoj lajmbanj, couh lumj bienqbaenz bouxvunz wnq nei, baez haeuj ranz couh nyaengq neix nyaengq haenx lo. Ngoenz daihngeih, de caeuxcaeux couh hwnqdaeuj guh ngaizhaet, yienzhaeuh bae ndaw reih ranz bohnax bang guhhong. Najbyak daxdaiq conh ok baenz naed baenz naed hanh, hoeng gwnz naj de cungj dwg riunyumnyum. Gou gvensim dwk cam daxdaiq: “Daxdaiq, mwngz mbouj dwg mbouj cwxcaih ha? Mwngz gaej guh baeg lai bw!” Daxdaiq riu dwk doiq gou naeuz: “Lan huk, daxdaiq mbouj dwg bouxvunz yiengjfuk, ciuh vunz nyaengq gvenq lo, youqndwi mbouj guh saeh cij ngaiz baenzbingh. Youq gizneix yienznaeuz nyaengq, hoeng gou roxnyinh cwxcaih lai lo.”

Ai, daxdaiq caen dwg geizheih lo!

(seiq nienzgaep Anh Gingboz)